सजन राई, दमक । झापाको दमकमा सम्पन्न प्रथम राष्ट्रिय स्तरीय दमक नमुना च्याम्पियनसिप २०८२ ब्याडमिन्टन प्रतियोगिताको उपाधिमा विभागीय टिमको वर्चस्व रहेको छ ।
समग्र नेपाली खेलकुदमा विभागीय टिमको वर्चस्व रहँदा, यही वर्चस्व ब्याटमिन्टनमा पनि देखिएको छ । तीन विभाग त्रिभुवन आर्मी, नेपाल प्रहरी र सशस्त्र प्रहरी दमकमा पनि अगाडी रह्यो । जस मध्ये आर्मी अग्रपङक्तिमा रहन सफल भयो ।
मेन्स डबल ओपन
पुष १० गते देखि १२ गते सम्म सञ्चालित प्रतियोगितामा सात वटा ईभेन्टको खेल भएको थियो । जस अन्तर्गत खुल्ला मेन्स डबलको उपाधि आर्मीका विधान अधिकारी र पविन लिङथेपको जोडीले जित्न सफल भयो । प्रतिस्पर्धात्मक फाइनल खेलमा तीनचुली ब्याडमिन्टन क्लबका नवीन श्रेष्ठ र प्रियन्सु क्षेत्रीलाई १८–२१, २१–१९ र १७–२१ को सेटमा हराउदै आर्मी च्याम्पियन बन्यो ।
यसै ईभेन्टको तेस्रो स्थानको उपाधि एपिएफका देवराज राना र प्रनिस ठकूरी सहित भोज राज गुरुङ र क्षितिज खनालको जोडीले जितेको छ । विजेताले क्रमशः ७१ हजार, ५१ हजार र ४१ हजार सहित ट्रफि, मेडल र प्रमाणपत्र प्राप्त गर्यो ।
१०० प्लस भेट्रान पुरुष डबल ओपन
दमक ७ मा रहेको दमक नमुना ब्याडमिन्टन एकेडेमिको आयोजनामा आयोजित प्रतियोगितामा १०० प्लस मेन्स डबलको उपाधि मण्डलाब्याडमिन्टन क्लबका इन्द्र महता र चेतसिंह थापाको जोडीले हात पार्न सफल भयो । यो जोडीले फाइनलमा एपिएफका विशाल प्रधान रप्रेम श्रेष्ठलाई २२–२० र २१–१५ को सोझो सेटमा हराएको थियो । यस ईभेन्टको तेस्रो स्थानमा मोरङका जीवन बोगटी र नवीन राई, दमक नमुना ब्याडमिन्टन एकेडेमिका अध्यक्ष प्रकाश राई र इलामका सन्जय भक्तराज रहन सफल भए । विजेताले क्रमशः ५१ हजार, ४१ हजार र ३१ हजार प्राप्त गर्यो ।
मिक्स डबल ओपन
यसैगरी खुल्ला मिक्स डबलको उपाधि तीनचुलीका नवीन श्रेष्ठ र आर्मीका रसिला महर्जनले जितेका छन् ।
फाइनलमा आर्मीका विधान अधिकारी र अमिता गिरीको जोडीलाई २१–१९ र २१–१२ को सोझो सेटमा हराउदै नवीन र रसिलाले उपाधि जितेको हो । त्यस्तै तेस्रो स्थानमा कस्तुरीका संगम गिरी र पुलिसका निता लम्साल सहित एपिएफका भोज बहादुर गुरुङ र भोजपुरका नाग्सलदेवी तामाङको जोडी रह्यो ।
वुमन्स डबल ओपन
यता खुल्ला महिला डबलको फाइनल खेलमा आर्मीका अनिता गिरी र रसिला महर्जनले एपिएफका नबिना राई र नखिपोटका निसामहाङ लिम्बूलाई २१–१४ र २१–१२ को सोझो सेटमा हरायो । तेस्रो स्थानमा भने धरान ब्याडिन्टन क्लबका रोजी राई र सृष्टि राई अनि पुलिसका निता लम्साल र भोजपुरका नाग्सलदेवी तामाङ रह्यो ।
प्रदेश स्तरीय बी डिभिजन पुरुष डबल
प्रदेश स्तरीय बी डिभिजन पुरुष डबलको विजेता भने धरान बनेको छ । फाइनलमा धरान ब्याडमिन्टन क्लबका सञ्जुहाङ लिम्बू र सुवासलिम्बूले ताप्लेजुङका आन्द्रेस लिम्बू र सुनसरी ब्याडमिन्टन एकेडेमीका सन्देश रायमाझीलाई १६–२१, २१–१० र २१–१८ को सेटमाहराएको थियो । यस ईभेन्टमा मोरङका मन्दिप घले र धरानका ज्योतिहाङ राई सहित धरानका मनि चाम्लिङ र आर्मीका सुप्रीम पन्ततेस्रो स्थान रह्यो ।
खुल्ला मिक्स डबल, खुल्ला महिला डबल र बी डिभिजनको पहिलो पुरस्कार ४१ हजार, दोस्रो ३१ हजार र तेस्रो २१ हजार रहेको छ ।
१३ वर्ष उमेर समूह महिला सिङ्गल
प्रतियोगितामा १३ वर्ष उमेर समूहको सिङ्गल महिला, पुरुष दुई ईभेन्ट भएको थियो । जसमा महिला तर्फ सुनसरी ब्याडमिनटनएकेडेमीका सबिज्ञा दाहाल प्रथम, जोजो ब्याडमिनटन एकेडेमीका डेनिसा प्रधान दोस्रो र पाँचथरका अलिका राई, आर्मीका युनिका राईतेस्रो भए ।
१३ वर्ष उमेर समूह पुरुष सिङ्गल
पुरुष तर्फ इलामका इन्जल दुलाल र सन्दिप चौधरी पहिलो र दोस्रो हुँदा सुनसरीका प्रज्ञान दाहाल र पाँचथरका स्पर्श तुम्बापोले तेस्रो स्थानमा चित्त बुझायो । विजेताहरुले क्रमशः १० हजार ६ हजार र ३ हजार प्राप्त गर्यो ।
विजयी खेलाडीहरुलाई दमक नगर प्रमुख राम थापा, उपप्रमुख रेगिना भट्टराई, दमक ७ वडा अध्यक्ष भिम पौडेल लगायत अतिथिहरुले पुरस्कार वितरण गरेका थिए ।
“र्याकेटको गर्जन, विजयको कदम” भन्ने मूल नारा रहेको प्रतियोगितामा नेपाल तथा छिमेकी मुलुक भारतका गरी ४०० भन्दा बढी खेलाडीको सहभागिता रहेको थियो ।
