सर्वोच्च अदालतमा रिक्त दुई जना न्यायाधीशको यथाशीघ्र पदपूर्तिको माग गर्दै सर्वोच्च अदालतमा रिट दायर भएको छ ।
अधिवक्ता दीपक बिक्रम मिश्रले मुद्दाको चाप बढेको र त्यसको समयमै फर्छ्याैट गर्न असर परिरहेको दावी गर्दै तत्काल सर्वोच्च अदालतको २ जना रिक्त न्यायाधीशको पदपूर्तिका लागि न्याय परिषद सचिवालयसँग माग गर्दै आइतबार सर्वोच्चमा रिट दायर गरेका हुन् ।
सर्वोच्च अदालतमा संवैधानिक व्यवस्था अनुसार प्रधानन्यायाधीशसहित २१ जना न्यायाधीशहरुको दरबन्दी रहेपनि २ जना न्यायाधीशहरुको पदपूर्ति हुन सकेको छैन ।
रिट निवेदनमा समयमै मुद्दाहरु फर्छ्याैट गर्नुपर्ने भएकाले तत्काल रिक्त न्यायाधीशहरुको पदपूर्ति गर्न न्यायपरिषद सचिवालयसँग माग गरिएको सर्वोच्चका सहायक प्रवक्ता नगेन्द्रकुमार कालाखेतीले जानकारी दिए ।
त्यसैगरी सर्वोच्च अदालतमा आइतबार नै पशुपंक्षी ढुवानीको उचित व्यवस्था गराउन माग गर्दै अर्को रिट पनि दायर गरिएको छ ।
अधिवक्ता पदमबहादुर श्रेष्ठले दायर गरेको रिटमा नागरिकको स्वच्छ रुपमा मासु खान पाउने अधिकार सुनिश्चित हुने गरी ढुवानीको व्यवस्था गर्न कृषि तथा पशुपंक्षी मन्त्रालयलाई परमादेश दिन माग गर्दै गर्दै रिट दायर गरेका हुन् ।
रिटमा पशुपंक्षी ढुवानी कार्य अत्यन्तै अमानवीय र क्रूर हुँदै आएको दावी पनि गरिएको सर्वोच्च अदालतका सहायक प्रवक्ता कालाखेतीले बताए ।
