५ चैत्र, माङसेबुङ ।
राजनीतिक दलहरुले नागरिकबाट प्राप्त अभिमत दुरुपयोग गरेको र संस्थागत भ्रष्टाचार मौलाएको भन्दै सोविरुद्ध आफूले इलाम २ मा हुने उपनिर्वाचनमा स्वतन्त्र उम्मेद्वारी घोषणा गरेको फोनिज महासचिव मिलन लिम्बूले जानकारी दिएका छन् ।
लिम्बूले आगामी वैशाख १५ मा हुन गइरहेको उपनिर्वाचनका लागि इलाम २ बाट स्वतन्त्र र साझा उम्मेदवारी घोषणा गरेका हुन् ।
करिब ३ हप्ता अगाडि नेकपा माओवादी केन्द्रसँगको आबद्धता त्यागेका उनले आइतबार काठमाडौँमा पत्रकार सम्मेलन आयोजनागरेर आफ्नो उम्मेद्वारी घोषणा गर्दै भने -‘हाम्रो क्षेत्रको विकासको चाहना पूरा गर्नका लागि मलाई इलाम–२ का जनताले यो माटोकोउम्मेदवारका रूपमा उभ्याएका छन् । म इलामको माटोको कसम खाएर भन्छु, अन्तिम सास रहेसम्म इलामेली जनताको पक्षमा कामगर्नेछु ।
दलीयकरणमा मौलाएको भ्रष्टाचार र बेथिति रोक्न आफूलाई इलामेली जनताले जिताउने लिम्बूले दाबी गरेका छन् ।
पहिचानको पक्षमा आफू सदा रहँदै आएको भन्दै लिम्बूले प्रदेश १ को पहिचान नामेट पार्ने कोशी नाम खारेज गरेर पहिचानका आधारमा प्रदेशको पुनः नामकरण गरिनुपर्नेमा जोड दिए ।
इलामेली नागरिकलाई जल, जमिन र जंगलको मालिक बनाउने आफ्नो अभियान रहेको भन्दै उनले यस अभियानमा साथ र सहयोग गर्न पत्रकार सम्मेलनमार्फत अपिल समेत गरे ।
राजधानीमा रहेर डेढ दशक अघिदेखि मेनस्टृम पत्रकारिता गर्दै आएका लिम्बू पत्रकारितामार्फत उत्पीडित र सीमान्तका पक्षमा कलम चलाउँदै आएका पत्रकार हुन् ।
फोनिजको महासचिवका रूपमा समेत कार्यरत उनले जनताको प्रत्यक्ष सेवा गर्न राजनीतिमा कृयाशील हुने भन्दै पेशागत पत्रकारिताबाट अलग रहने समेत बताए ।
लिम्बू इलाम क्षेत्र नम्बर २ को माङसेबुङ गाउँपालिका वडा नम्बर २ का स्थायी बासिन्दा हुन् ।
इलाम २ बाट निर्वाचित नेकपा एमालेका सुवास नेम्वाङको निधन भएपछि यो क्षेत्रमा उपनिर्वाचन हुन लागेको हो ।
