प्रेम कथामा नेपाली फिल्म ‘प्रेम चरी’ निर्माण हुने भएको छ । बिचल किराँतीले निर्देशन गर्ने यस फिल्मको शुक्रवार मैतिदेवीस्थित मैतिदेवी मन्दिरमा मुहूर्त गरिएको छ ।
चन्द्र भट्टराईको कथा रहेको फिल्मलाई एस.बि.आर फिल्मस् र आई स्टार इन्टरनेसनल फिल्मसको ब्यानरमा निर्माता संजयश्री र मोनिका कुमारी ठाकुरले संयूक्त रुपमा निर्माण गर्नेछन् ।
भाद्र १ गतेबाट फ्लोरमा जाने ‘प्रेम चरी’ मा प्रेम कथासँगै एक्सन पनि रहने निर्देशक किराँतीले जानकारी दिए । यस फिल्ममा पुस्कर रेग्मी, रेश्मा सुवेदी, सपना ओली, संजयश्री र मनमोहन ठाकुर (दीलिप) को प्रमुख भूमिका रहनेछ ।
‘प्रेम चरी’ ६० लाखको बजेटमा निर्माण हुने बताइएको छ । फिल्मका गीतमा ओम सुनारको संगीत रहनेछ । निर्माता ठाकुरका अनुसार, फिल्मका गीतको सम्पूर्ण काम भारतमा हुनेछ । रामजी लामिछानेको कोरियोग्राफी रहने यो फिल्मलाई पवन गौतमले खिच्दैछन् ।
