बिर्तामोड– नेपाली कांग्रेसका नेता कृष्णप्रसाद सिटौलाले छोरा श्याम सिटौलाको बिहेमा खर्च हुने पैसा झापाका स्थानीय तहले स्थापना गरेको कोरोना राहत कोषका झापाका स्थानीय तहलाई पाँच लाख रुपैयाँ सहयोग गरेका छन् ।
सिटौलाले आफ्नो निर्वाचन क्षेत्रका चारवटा स्थानीय तहलाई एक लाख रुपैयाँका दरले र आफ्नै घर छेउका दुईवटा वडा कार्यालयहरुलाई पचास हजार रुपैयाँका दरले उपलब्ध गराइएका छन् ।
भद्रपुर नगरपालिका, हल्दिबारी गाउँपालिका, कचनकवल गाउँपालिका, बाह्दशी गाउँपालिकालाई एक-एक लाख, भद्रपुर- १० नम्बर वडा कार्यालय र बिर्तामोड १० नम्बर वडा कार्यालयलाई ५०-५० हजार रुपैयाँ सहयोग दिइएकाे श्याम सिटौलाले बताए ।
नेता सिटौलाका छोरा श्याम र बुहारी मनिषाले भोज लगायत अतिरिक्त खर्चको रकम सोमबार बिहान स्थानीय तहका प्रमुखलाई हस्तान्तरण गरेका हुन् ।
सिटौलाले लक डाउनका बीच सात जना जन्तीसहित आइतवार छोरा श्यामको बिहे गरेका थिए । विवाहमा बेहुलाका बुवासहित पाँचजना जन्ती भद्रपुरबाट विर्तामोड पुगेका थिए । जन्तीलाई प्रवेश गर्नु अघि गेटमै साबुन पानीले हात धुन लगाइएको थियो । उपस्थित सबैले सामाजिक दुरी कायम गरेका थिए भने बेहुलापट्टिका सबैले मास्क लगाएका थिए भने घरपट्टिकाले पनि सबैले मास्क लगाएका थिए।
