adv
adv

अमेरिकाले कोरोना विरुद्धको २० लाख भ्याक्सिन तयार गरेको ट्रम्पको दाबी

काठमाडौं, २४ जेठ । अमेरिकाले कोभिड–१९ संक्रमणबाट बच्नका लागि २० लाख भ्याक्सिन तयार गरेको अमेरिकी राष्ट्रपति डोनल्ड ट्रम्पले दाबी गरेका छन् । उनले यी भ्याक्सिन प्रयोगका लागि तयार भएको बताउँदै वैज्ञानिकले यसको सुरक्षा र प्रभावकारीताबारे विश्लेषण गर्न मात्रै बाँकी भएको बताएका छन् ।

ट्रम्पले यो दाबी शुक्रबार आयोजित पत्रकार सम्मेलनमा गरेका हुन् । यद्यपि, ट्रम्पले कुन कम्पनी र कस्तो खालको भ्याक्सिनको कुरा गरेका हुन् भन्ने खासै जानकारी दिएनन् । उनले ती भ्याक्सिनको प्रयोग कहिलेदेखि सुरु हुन्छ भन्नेबारे निश्चित समयसीमा पनि तोकेका छैनन् ।

पत्रकार सम्मेलनमा उनको यस्तो बयानपछि अमेरिकाका वरिष्ठ संक्रामक रोग विशेषज्ञ डाक्टर एन्थोनी फाउचीले आफूले यसबारे टिप्पणी गर्न नसक्ने बताएका छन् । यद्यपि, मंगलबार डाक्टर फाउचीले एक मेडिकल सेमिनारमा अर्को वर्षसम्म भ्याक्सिन तयार गर्ने आशा भने व्यक्त गरेका थिए ।

न्यूयोर्क टाइम्सको रिपोर्ट अनुसार अमेरिकी प्रशासनले भ्याक्सिन बनाउनका लागि पाँच कम्पनीलाई काममा लगाएको छ । अमेरिकामा थुप्रै कम्पनी वैज्ञानिकको मञ्जुरी अघि नै ठूलो मात्रामा भ्याक्सिन बनाउने होडमा लागेका छन् । यीमध्ये मोडेर्ना, नोवाभ्याक्स र फाइजरजस्ता कम्पनी समावेश छन् ।

डाक्टर फाउचीले मंगलबार पत्रकारलाई खोप निर्माणमा ‘मोडेर्ना’ सबैभन्दा अगाडि देखिएको बताएका छन् ।  अमेरिकामा कोरोना भाइरसबाट संक्रमित हुनेको संख्या १८ लाख ९७ हजार ८ सय ३८ पुगेको छ । अहिलेसम्म अमेरिकामा एक लाख ९ हजार १ सय ४३ जनाको मृत्युु भएको छ ।

adv

Leave a Reply

Your email address will not be published. Required fields are marked *

सम्बन्धित शीर्षकहरु