झापा । कर्मचारीमा कोरोना भाइरस संक्रमण पुष्टि भएपछि झापाका दुई स्थानीय तह बुधवारदेखि बन्द हुने भएका छन् ।
बाह्रदशी र झापा गाउँपालिका कार्यालय मङ्सिर ३ गतेदेखि बन्द हुने सम्बद्ध स्थानीय पालिकाले सूचना प्रकाशन गरी जानकारी दिएका छन् । दुवै स्थानीय तहले छुट्टाछुट्टै निर्णय गर्दै गाउँपालिका बन्द गर्ने सूचना जारी गरेको छ।
बाह्रदशी गाउँपालिकाका एक ओभरसियरलाई कोरोना संक्रमण पुष्टि भएको थियो। उनी होम आइसोलेसनमा बसेका छन्।
कोरोना भाइरसको महामारी असमान्य बनेपछि बाह्रदशीले मङ्सिर ६ गतेसम्म गाउँपालिका अन्तरगत सबै कार्यालय बन्द राख्ने निर्णय गरेको छ। अब, छठ पर्व सकिएर मङ्सिर ७ गतेदेखि मात्र गाउँपालिका कार्यालय नियमित रुपमा सञ्चालन हुने बाह्रदशी गाउँपालिकाका अध्यक्ष खड्ग राजवंशीले बताए ।
त्यस्तै झापा गाउँपालिकाका १२ जना कर्मचारीहरू संक्रमित छन्। गाउँपालिका एकै पटक यतिका कर्मचारी संक्रमित भएपछि मङ्सिर ९ गतेसम्म कार्यालय बन्द राख्ने निर्णय गरेको छ।
संक्रमित सबै कर्मचारी हाल होम आइसोलेसनमा बसेकाले मङ्सिर ३ देखि ९ गतेसम्म कार्यालय बन्द रहने गाउँपालिका अध्यक्ष जयनारायण शाहले बताए। सो गाउँपालिका कार्यालय कात्तिक २७ गतेदेखि नै बन्द रहेको थियो ।
