adv
adv

किरातीहरुले साझा लिपि बनाउने, लिपिको नाम ‘किरात सिरिजङ्गा’ हुने

काठमाडौ । नेपालका किरातहरुले एउटै साझा लिपि निर्माण गरी प्रयोग गर्ने भएका छन् ।

किरात राई यायोक्खा, किरात याक्थुङ चुम्लुङ, सुनुवार सेवा समाज, किरात याक्खा छुम्मासहितको ‘किरात समन्वय समिति’ले एउटै साझा लिपि निर्माण गरी लेखन प्रणालीको विस्तार तथा विकास गर्ने निर्णय गरेको हो ।

यायोक्खाका महासचिव जनक राईकाअनुसार काठमाडौंको कोटेश्वरस्थित सुनुवार सेवा समाजको कार्यालयमा बसेको समन्वय समितिको बैठकले सबै किरातहरुको साझा लिपि तयार पारी प्रयोग गर्ने निर्णय गरेको हो ।

साझा लिपिको नाम ‘किरात सिरिजङ्गा लिपि’ हुनेछ ।

किरात याक्थुङ चुम्लुङले २०४९ सालदेखि नै किरात सिरिजंगा लिपि नामकरण गरी प्रयोगमा ल्याएको किरात लिपिलाई नै विस्तार गरी सबै किरातीहरुको भाषा अनुसार परिमार्जन गरी साझा लिपि निर्माण गरिनेछ ।

यसका लागि बैठकले भाषाविद् तथा त्रिभुवन विश्वविद्यालयका उपप्राध्यापक डा. तारामणि राईको संयोजकत्वमा ९ सदस्यीय कार्यदल समेत बनाएको छ ।

कार्यदलको सदस्यहरुमा प्राज्ञ अमर तुम्याहाङ, डा. लाल रापचा, डा. गणेश जिमी, गणेश वाम्बुले राई, डिबी आङ्बुहाङ, इन्दिरा जिमी र उत्तम सुनुवार छन् । एकजना सदस्य पछि थपिनेछ ।

कार्यदललाई आगामी माघ १ गतेसम्मका लागि समय दिइएको छ ।

कार्यदलले किरात सिरिजङ्गा लिपिलाई साझा रुपमा लेख्ने प्रणालीमा प्रयोग हुनेगरी अध्ययन गर्ने, सम्पूर्ण किराती भाषाहरुलाई किरात सिरिजङ्गा लिपिमा लेखनका लागि वर्णहरु निर्धारण गरी समायोजन गर्ने र वर्ण तथा लिपि सार्वजनिक गरेपश्चात थप्नुपर्ने ध्वनी, चिन्हसहितको लिपि प्रतिवेदन तयार पार्ने कार्यादेश दिइएको छ ।

२५ व्यञ्जन र १० स्वर वर्ण रहेको किरात सिरिजङ्गा लिपिलाई करिब तीन दर्जन किराती भाषाहरुलाई समेट्ने गरी साझा लिपि बनाउनका लागि त्यसमा थप गरी करिब ४३ वटा व्यञ्जन वर्ण पुर्याउनुपर्ने सुझाव यसअघि नै डा. तारामणि राईले दिएका थिए ।

यायोक्खा महासचिव जनक राईले नेपालका किरातहरुको साझा लिपि निर्माणबारे पछिल्लो केही महिनायता औपचारिक छलफल भइरहेको बताए ।

उनले गत असारको अन्तिम सातादेखि किरातजन्य संस्थाका प्रतिनिधिहरुबीच साझा लिपि निर्माणबारे औपचारिक छलफल भएको बताए । साल्पाअनलाईनबाट

Advertise Expired !

Leave a Reply

Your email address will not be published. Required fields are marked *

सम्बन्धित शीर्षकहरु