दमक, १९ माघ ।
कोरोनाका कारण स्थगित परीक्षा आउँदो फागुन १ गतेबाट सञ्चालन गर्ने त्रिभुवन विश्वविद्यालयले जनाएको छ ।
त्रिवि परीक्षा नियन्त्रण कार्यालय बल्खुले बुधबार सूचना प्रकाशित गरेर .कोरोनाका कारण स्थगित परीक्षा सञ्चालनका लागि परीक्षा तालिका प्रकाशित गरेको हो ।
परीक्षा तालिकामा जनाइए अनुसार विज्ञान तथा प्रविधि अध्ययन संस्थानतर्फ चार वर्षे वीएससी चौथो वर्षको नियमित तथा आंशिक परीक्षा फागुन १ बाट सञ्चालन हुनेछन् ।
त्यस्तै वार्षिक परीक्षा प्रणालीअनुसार ३ वर्षे एलएलबी तेस्रो वर्ष नियमित परीक्षा पनि फागुन १ देखि सुरू हुने छ ।
कोरोना भाइरसको संक्रमण बढ्न थालेपछि त्रिविले माघ मसान्तसम्म परीक्षा तथा भौतिक रूपमा कक्षा सञ्चालन कार्य रोकेको थियो । माघ ११ देखि अनलाइनबाट कक्षा सञ्चालन गरिएका थिए ।
विभिन्न संकायका परीक्षा तालिका र परीक्षा केन्द्रहरू बारे कार्यालयले आफ्नो वेबसाइटमा सूचना राखेको छ ।
