२४ बैशाख, दमक ।
आज सातौं राष्ट्रिय पत्रकारिता दिवस ।
नेपालमा पहिलो अखाबार गोरखापत्र प्रकाशन भएको दिनलाई आधार मानेर बैशाख २४ गते हरेक वर्ष राष्ट्रिय पत्रकारिता दिवस मनाउने गरिन्छ ।
बिगतका वर्षहरुमा सरकारी तवरबाटै विभिन्न कार्यक्रम गरी यो दिवस मनाउने गरिए पनि यस पटक भने स्थानीय तह निर्वाचनका कारण निर्वाचन आचार संहिता लागू भएकाले औपचारिक कार्यक्रम भएनन् ।
१९५८ वैशाख २४ गतेदेखि साप्ताहिक रूपमा गोरखापत्रको प्रकाशन सुरु भएको हो । हाल गोरखापत्र संस्थानमार्फत दैनिक प्रकाशनमा रहेको सरकारी स्वामित्वको गोरखापत्रले प्रकाशनको १ सय २१ वर्ष पूरा गरेर १ सय २२ औं वर्षमा प्रवेश गरेको छ ।
नेपाल सरकारले सात वर्षअघि २०७३ बाट आजको दिनलाई राष्ट्रिय पत्रकारिता दिवसका रूपमा मनाउने निर्णय गरेको थियो । त्यसयता हरेक वर्ष राष्ट्रिय पत्रकारिता दिवसका दिन विविध कार्यक्रम गरी मनाउन चलन छ ।
