सम्मानित दुई पत्रकार गोविन्दचन्द्र क्षेत्री र जोश्ना श्रेष्ठ
विर्तामोड । नेपाल प्रेस युनियन झापा शाखाको बार्षिक साधारण सभामा दुई पत्रकारसहित १२ जनालाई सम्मानसहित पुरस्कृत गरिएको छ ।
शनिबार युनियन झापाको साधारण सभामा पत्रकार गोविन्दचन्द्र क्षेत्री, जोस्ना श्रेष्ठसहित स्थानीय तहमा निर्वाचित जनप्रतिनिधि, पुरस्कार अक्षयकोषका दाता, संस्थाले पत्रकारहरुको बृहत्तर हित, बहुउद्देश्यीय लक्ष्य राखेर स्थापना गरेको ‘नेपाल प्रेस युनियन पत्रकार अक्षयकोष’ बृद्धिका लागि सहयोग गर्ने दाताहरुलाई सम्मान गरिएको हो ।
युनियन झापा शाखाका अध्यक्ष इन्दु पूर्वेलीको सभापतित्व एवम् प्रदेश सरकारका भूमि व्यवस्था, सहकारी तथा गरीबी निवारण मन्त्री ओमप्रकाश सरावगीको प्रमुख आतिथ्यमा कार्यक्रम सम्पन्न भएको थियो ।
युनियनका केन्द्रीय पार्षद यज्ञप्रसाद र सकुन्तला पाठकले दिवंगत बुबाआमा टंकप्रसाद–रमादेवी पाठकको स्मृतिमा स्थापना गरेको टंकप्रसाद–रमादेवी पाठक स्मृति पत्रकारिता पुरस्कारबाट भद्रपुरबाट प्रकाशित नयाँ सन्दर्भ साप्ताहिकका सम्पादक गोविन्दचन्द्र क्षेत्री, उहाँहरुकी छोरीज्वाईँ टीकादेवी–कृष्णकुमार संग्रौलाले प्रेस युनियनमा स्थापना गरेको रमादेवी–टंकप्रसाद स्मृति पत्रकारिता पुरस्कारबाट रेडियो विराटमा कार्यरत जोस्ना श्रेष्ठलाई पुरस्कृत गरिएको छ । यसैवर्षदेखि वितरण प्रारम्भ गरिएको पुरस्कारको राशी जनही ११ हजार एकसय रुपैयाँ नगद, सम्मान पत्र र दोसल्लाद्वारा पत्रकारद्वयलाई पुरस्कृत गरिएको हो ।
सम्मानित दाताहरू
त्यसैगरी अक्षयकोषका दाताहरु शिव कँडेल, पार्वता खरेल विमली, गंगाप्रसाद मैनाली, कृष्ण गिरी लगायतलाई सम्मान गरिएको कार्यक्रममा पुरस्कार अक्षयकोषका दाता यज्ञप्रसाद–सकुन्तला पाठक, टीकादेवी–कृष्णकुमार संग्रौलालाई सम्मान गरिएको थियो ।
कार्यक्रममा स्थानीय तहमा निर्वाचित गौरीगञ्ज गाउँपालिकाकी अध्यक्ष फुलवती राजवंशी, झापा गाउँपालिकाकी उपाध्यक्ष अन्जु थपलिया सहितलाई दोसल्ला ओढाएर सफल कार्यकालको शुभकामनासहित सम्मान गरिएको थियो । पुरस्कृत र सम्मानित सबैलाई प्रमुख अतिथि सरावगीसहित अतिथिहरुले सम्मान गरेका थिए ।
कार्यक्रममा प्रमुख अतिथि सरावगी, गौरीगञ्ज गाउँपालिकाकी अध्यक्ष राजवंशी, झापा गाउँपालिका उपाध्यक्ष थपलिया, नेपाल पत्रकार महासंघ प्रदेश १ का कोषाध्यक्ष विमल लामिछाने, पुरस्कृत प्रतिभा तथा प्रेस युनियनका केन्द्रीय सदस्य गोविन्दचन्द्र क्षेत्री, नारी सञ्चार गृहकी अध्यक्ष भीमा शिवाकोटी, पुरस्कार अक्षयकोषका दाताका तर्फबाट कृष्णकुमार संग्रौला, प्रेस युनियन पत्रकार प्रोत्साहन अक्षयकोषका दाताका तर्फबाट शिव कँडेल लगायतले बोलेका थिए ।
त्यस्तै शनिवार नै सम्पन्न संस्थाको बन्द सत्रले संस्थाको सांगठानिक तथा कोषाध्यक्ष ओमप्रकाश भट्टराईले प्रस्तुत गरेको आर्थिक प्रतिवेदन पारित गरेको छ । बन्द सत्रको सञ्चालन अध्यक्ष मण्डलका सदस्य राजेन्द्र गौतमले सञ्चालन गरेका थिए । कार्यक्रममा टिप्पणी प्रस्तुत ज्ञानेन्द्र निरौलाले गरेका थिए । उपाध्यक्ष गिरीराज भट्टराईले स्वागत र कार्यक्रमको सञ्चालन डिल्लीराम घोर्साईले गरेका थिए ।
कार्यक्रममा नेपाल पत्रकार महासंघका अध्यक्ष एकराज गिरी, उपाध्यक्ष सुशिला संग्रौला, प्रेस चौतारी झापा अध्यक्ष मनकुमार गदाल, समाजवादी प्रेस संगठनका प्रदेश संयोजक तीर्थ सिग्देल, आदिबासी,जनजाति पत्रकार महासंघ फोनिज झापाका अध्यक्ष भूमिका सुब्बा, नेपाल पत्रकार महासंघ प्रदेश १ का सदस्यहरु विष्णु सुब्बा, लिलाराज झापाली, सुरेन्द्र भण्डारी लगायतको उपस्थिति रहेको थियो ।
