१५ कार्तिक, बिर्तामोड ।
नेपाल पत्रकार महासंघ झापा शाखाको वार्षिक साधारणसभा कात्तिक २५ गते शुक्रबार हुने भएको छ ।
महासंघ झापा शाखाका अध्यक्ष एकराज गिरीको अध्यक्षतामा आइतबार सम्पन्न कार्य समितिको बैठकले वार्षिक साधारणसभा कार्तिक २५ गते बिर्तामोडस्थित अतिथि सदनमा ११ बजेबाट गर्ने निर्णय गरेको हो ।
महासंघको वार्षिक साधारणसभामा सचिव डिकेश लामाबाट सांगठनिक प्रतिवेदन र कोषाध्यक्ष रञ्जित प्रसाईंबाट आर्थिक प्रतिवेदनसहित विभिन्न प्रस्तावहरु पेस हुने उपाध्यक्ष केशव भट्टराईले जानकारी दिए ।
महासंघ केन्द्रीय समितिले जिल्ला शाखाहरुको साधारणसभा कार्तिक मसान्तभित्र गरिसक्नुपर्ने निर्णय गरे बमोजिम झापा शाखाले तोकिएको समयसीमाभित्रै साधारणसभा गर्न लागेको बताइएको छ ।
गत असोज ५ र ६ गते भक्तपुरको नगरकोटमा सम्पन्न केन्द्रीय समितिको बैठकले शाखाको साधारणसभा कार्तिक मसान्तसम्म, महासंघ प्रदेश समितिको साधारणसभा मंसिर १५ गतेदेखि पुष १ गतेसम्म र केन्द्रीय समितिको साधारणसभा पुष ८ र ९ गते कर्णाली प्रदेशको राजधानी सुर्खेतमा गर्ने निर्णय गरेको थियो ।
साधारणसभा सम्बन्धी केन्द्रको निर्णयसहितको सर्कुलर झापा शाखाका सबै सदस्यहरुलाई एक महिनाअघि नै इमेल तथा सामाजिक सञ्जाल मार्फत जानकारी गराइएको सचिव लामाले बताए ।
झापा शाखामा हाल महासंघका साधारण सदस्य २ सय ६१ जना रहेका छन् ।
