मेचीनगर । मेची उद्योग वाणिज्य संघको १९ औं वार्षिक साधारणसभामा राष्ट्रिय समाचार समिति झापाकी समाचारदाता अम्बिका भण्डारी‘आर्थिक पत्रकारिता पुरस्कार’ बाट सम्मानित भएकी छिन् ।
धुलाबारीको रोयल निर्वाणको सभाहलमा आज आयोजित कार्यक्रममा मेची उद्योग बाणिज्य संघद्वारा स्थापित उक्त पुरस्कार पत्रकार भण्डारीलाई प्रदान गरिएको हो ।
उनलाई नगद रु. २१ हजार राशी र सम्मान पत्रले पुरस्कृत गरिएको छ । राससको झापा कार्यालय प्रमुखको समेत जिम्मेवारी सम्हालेकी भण्डारी दुई दशकदेखि निरन्तर पत्रकारिता क्षेत्रमा क्रियाशील छिन् । लोकतन्त्र पोस्ट, जनसंसद् र पूर्वाञ्चल दैनिकमा उनी आबद्द छिन् ।
संघले २०६९ सालदेखि आर्थिक क्षेत्रमा कलम चलाउने पत्रकारलाई पुरस्कृत गर्दै आएको छ । पहिलो पुरस्कार भद्रपुरका अग्रज पत्रकार गोविन्दचन्द क्षेत्रीले पाएका थिए ।
यसैगरी, उत्कृष्ट कर्मचारीको रुपमा संघका एम्बुलेन्स चालक मिनबहादुर खड्का (कुमार)लाई नगद रु १५ हजारसहित सम्मान पत्रले पुरस्कृत गरिएको छ ।
साधारणसभाको उद्घाटन प्रदेश १ का उद्योग बाणिज्य महासंघका अध्यक्ष राजेन्द्र राउतले गरेका थिए । आजै उद्घाटन र बन्द सत्र सम्पन्न भएको छ । बन्द सत्रमा उद्योग वाणिज्य क्षेत्रका समस्या र तिनको समाधानका विषयमा छलफल भएको थियो ।
कार्यक्रममा अध्यक्ष खेम प्रसाईले संस्थाले बर्षभरि गरेका गतिविधिको बारेमा बार्षिक प्रतिवेदन प्रस्तुत गरेका थिए । संस्थाका महासचिव दिनेश शाक्यले सञ्चालन गरेको कार्यक्रमको समापन बरिष्ठ उपाध्यक्ष कपिल क्षेत्रीले गरेका थिए ।
