सजन राई
२७ चैत, दमक ।
झापाको दमकमा प्रथम गुरु टोली फुटसल प्रतियोगिता २०८१ हुने भएको छ ।
दमक १ भाङबारीस्थित स्पा एनि फुटसलको खेल मैदानमा नयाँ वर्षको अवसर पारेर बैशाख १ गते एक दिने प्रतियोगिता हुने भएको हो।
विभिन्न क्षेत्रमा आबद्ध युवाहरु मिलेर सुरु गरेको गुरु टोली समूहले आयोजना गर्ने प्रतियोगिताको टाइसिट सार्वजनिक भएको छ ।
विभिन्न सामाजिक कार्य गर्दै आइरहेको टोलीले फुटसल प्रतियोगिता भने पहिलो पटक आयोजना गर्न लागेको खेल संयोजक तथाटोलीका सचिव आकाश लिम्बूले बताए । उनले प्रतियोगिताको मूल नारा नै “हामी सँगै एकजुट हुन्छौ” राखेको बताए ।
टोलीका अध्यक्ष विशाल देवानले भने -‘खेलकुदले युवाहरुलाई व्यस्त बनाई कुलतमा फस्न नदिन महत्वपूर्ण भूमिका खेल्छ । यो पनिराष्ट्रको लागि योगदान नै हो । तर खेलाडीहरुले खेल सँगै समाज भने बुझ्न सक्नु पर्दछ ।’
इन्ट्री शुल्क ३१ सय रुपैयाँ रहेको प्रतियोगिताको विजेताले नगद ३१ हजार १ सय ११ रुपैयाँ सहित ट्रफि, मेडल र प्रमाणपत्र हात पार्नेछन् भने उपविजेताले नगद १६ हजार १ सय ११ रुपैयाँ सहित ट्रफि, मेडल र प्रमाणपत्र पाउने छन् ।
आयोजक गुरु टोली र रोयल एफसीबीच उद्घाटन खेल हुने प्रतियोगितामा आठ वटा टिमको सहभागिता रहेको छ ।
