सजन राई ।
दमक । झापाको दमकमा साकेला सिली प्रशिक्षणको उद्घाटन तथा सामाग्री हस्तान्तरण कार्यक्रम सम्पन्न भएको छ । सोमवार दमक-५ स्थित दिपिनि आधारभूत विधालयको सभाहलमा आयोजित कार्यक्रममा एक महिने निशुल्क साकेला प्रशिक्षण शुरु गर्नुका साथै साकेला सम्बन्धी आवश्यक सामाग्रीहरु हस्तान्तरण गरिएको थियो ।
दमक ५ वडा कार्यलयको आर्थिक सहयोगमा किरात राई यायोक्खा दमक ५ वडा समितिले आयोजना गरेको कार्यक्रममा बोल्दै प्रमुख अतिथि दमक नगरपालिका प्रमुख राम कुमार थापाले सबै भाषा, धर्म, संस्कार र संस्कृतिलाई नगरले समान रुपमा हेर्ने र आवश्यकता अनुसार सहयोग गर्ने बताए ।
कार्यक्रमका विशिष्ट अतिथि दमक नगर उपप्रमुख रेगिना भट्टराईका अनुसार युवा पुस्तामा संस्कृतिप्रतिको मोह बढ्नुले समाजमा सकारात्मक सन्देश दिएको छ ।
दमक ५ वडा अध्यक्ष तथा कार्यक्रममा विशिष्ट अतिथि इन्द्र बहादुर गुरुङले संस्कार संकृति हराए पहिचान हराउने, पहिचान हराए आफु हराउने बताए । साथै सबै जातजातिका सांस्कृतिक प्रतियोगिता हुनु पर्ने र उक्त प्रतियोगिताको लागि नगरले पनि सहयोग गर्नु पर्ने कुरामा जोड दिए ।
वडाबाट विनियोजित रकमबाट साकेला सम्बन्धी आवश्यक सामाग्रीहरु खरिद गरी औपचारिक रुपमा अतिथिहरुको हातबाट हस्तान्तरण गरिएको आयोजक समितिका अध्यक्ष शिवदास राईले जानकारी दिए । सोमबार देखि एक महिनाको लागि बेलुका ६ बजे देखि साकेला सिली प्रशिक्षण सुरु गरेको हुनाले इच्छुकले दिपिनि स्कुलको प्राङ्गणमा सहभागी हुन पनि आव्हान गरे ।
