काठमाडौं । वर्षा र सहकालका देवता मानिने रातो मच्छिन्द्रनाथको रथयात्रा सुरु भएको छ । हरेक वर्ष वैशाख शुक्ल प्रतिपदादेखि असार शुक्ल चौथीसम्म चल्ने यो जात्रा बिहीबार बेलुका ५ बजेबाट सुरु भएको हो ।
मच्छिन्द्रनाथलाई ६ महिना पाटनको तःबहाल र ६ महिना बुङ्मतीमा राख्ने चलन अनुसार गत मंसिरमा पाटनको तःबहाल मन्दिरमा ल्याएर राखिएको थियो ।
जात्राको पहिलो दिन ३२ हात लामो र ४८ फिट अग्लो रथलाई तानेर गांःवहालमा पुर्याइएको छ । स्थानीयले बुधबार र बिहीबार दिनभर गाईदान, शान्ति स्वस्ति लगायत पूजा गरेका थिए । यो जात्रा सञ्चालन गर्न मूः (मूल) ६ र अन्य कचाः (सहायक) गुठीले गुठी संस्थान र स्थानीयसँग सहकार्य गर्दै आईरहेको छ ।
भनाई अनुसार मानवीय क्षति नहोस् भनेर यी देवताको पूजाआजा गरिन्छ । रथ गुडाउनुभन्दा अघि पांग्रामा क्षमा, सिद्धि पूजा र भैरव प्रतिस्थापन गर्नुपूर्व चित्रकारहरू रङरोगन गर्छन् ।
