माङसेबुङ । इलामको माङसेबुङमा बृहत साकेला सिली प्रदर्शनी कार्यक्रम हुने भएको छ । उभौलीको अवसर पारेर यही जेठ २ गते शनिबार माङसेबुङ ६ हस्टेमा किराँत राईहरुको सांस्कृतिक नाच साकेला सिली प्रदर्शनी हुने भएको हो ।
प्रत्येक वर्षको उभौलीमा आयोजना हुदै आइरहेको यस कार्यक्रममा झापा, पाँचथर र इलामको गरी २२ वटा साकेला टोलीको सहभागिता रहने साकेला सिली उभौली व्यवस्थापन मूल तयारी समितिका सचिव ध्रुव राईले जानकारी दिए । यसै गरी पाँचथरको दुई वटा केलाङ टोली समेत आउने राईले बताए ।
किरात राई समुदायले हर्षोल्लासका साथ मनाउने उक्त कार्यक्रममा इलाम जिल्ला समन्वय समिति अध्यक्ष जय प्रकाश राई प्रमुख अतिथिको रुपमा रहने आयोजक समितिले जानकारी दिएका छन् । समितिका अनुसार कार्यक्रममा माङसेबुङमा किरात राई यायोक्खा निर्माणमा अग्रणी भूमिका खेलेका लामो समय शिक्षण पेशामा रहि समाजलाई सहि मार्गदर्शन दिएका तथा विभिन्न सामाजिक संस्थाहरुमा रहि काम गरिरहेका माङसेबुङ ६ निवासी भक्त बहादुर एवाईलाई सम्मान गरिने कार्यक्रम रहेको छ । कार्यक्रममा साकेला सिली प्रदर्शनीसँगै रैथाने उत्पादनलाई प्रवर्द्धन गर्ने उद्देश्यले स्थानीय रुपमा उपलब्ध खानेकुरा पाइने समेत आयोजक समितिले बताए ।
किराँती समुदायले उभौली(धिरिनाम) र उधौली(छिरिनाम) गरेर वर्षमा दुई पटक यो चाड मनाउने गर्दछ । विशेष गरी राई समुदायले वैशाखे पूर्णिमामा मनाइने उभौलीलाई महत्वका साथ हेर्ने गर्दछ ।
पृति तथा प्रकृति पूजक किराँतीहरूले उभौलीलाई बाली लगाउने समय भएकोले प्रशस्त पानी परोस, दैवी प्रकोप नआवोस, रोगव्यादी नलागोस, सुख शान्ती छावोस भनी मनाउने गरिन्छ । मंसिरे पूर्णेमा मनाइने उधौलीलाई बाली नाली फस्टायो, धन आयआर्जन भयो, सुखशान्ति छायो, आउदो समयमा पनि यस्तै होस भन्ने कामना सहित मनाइन्छ ।
प्रकृति, चराचुरुंगी तथा जीवजन्तुको नक्कल गर्दै ढोल, झ्याम्टाको तालमा भाका मिलाउदै साकेला नाच्ने गरिन्छ । बालक देखिवृद्धासम्मले नाच्ने साकेला सिली नयाँ पुस्ताले अझ उत्सुकताका साथ अवलम्बन गरिरहेको छ । उभौली र उधौली चाडलाई किराँत समुदायका राई, लिम्बू, याक्खा र सुनुवारले मुख्य चाडका रूपमा मनाउने गरेका छन् ।
