बेल्जियम र ट्युनिसिया बिच भएको खेलमा बेल्जियम विश्वकपको नकआउट चरण नजिक पुगेको छ । इडन हजार्ड र रोमेलु लुकाकुको दुई-दुई गोलसँगै बेल्जियमले ट्युनिसियामाथि सहज जित हात पारेको हो । ट्युनिसिया भने समूह चरणबाटै बाहिरिने देखिएको छ ।
नेपाली समय अनुसार शनिबार बेलुकी पौने छ बजे भएको खेलमा बेल्जियमले ट्युनिसियामाथि ५-२ को सहज जित हात पारेको हो ।
बेल्जियमले छैटौं मिनेटमा नै कप्तान हाजार्डको पेनाल्टी गोलमार्फत अग्रता लिएको थियो । १० मिनेटपछि लुकाकुले गोल थपे । तर, त्यसको दुई मिनेटपछि नै ट्युनेनियाले गोल फर्कायो । ब्रोनले १८ औं मिनेटमा हेड गोल गर्दै २-१ को स्थितिमा ल्याए ।
पहिलो हाफको अतिरिक्त समयमा लुकाकुले व्यक्तिगत दोस्रो गोल गर्दै बेल्जियमलाई फेरि २ गोलको अग्रता दिलाएका थिए । दोस्रो हाफमा पनि बेल्जियम हाबी भयो । ५१ औं मिनेटमा हाजार्डले अर्को गोल थप्दै खेललाई ४-१ को अन्तरमा पुर्याउन सफल भए । त्यसपछि बेल्जियमले लुकाकु र हाजार्डलाई मैदानबाहिर निकाल्यो ।
सब्टिच्युट खेलाडी बत्सुयीले ९० औं मिनेटमा बेल्जियमका लागि अर्को गोल गरे । तर, ट्युनिसयाले हार भने मानेन । इन्जुरी टाइममा ट्युनेसियाका कप्तान खाजरीले गोल गर्दै खेल ५-२ मा टुंग्याएको थियो ।
