करिअरको नाजुक मोडमा रहेका अभिनेता आर्यन सिग्देलको ड्रिम प्रोजेक्ट ‘कायरा’ ले शुक्रवारबाट देशैभर प्रदर्शन आरम्भ गरेको छ । यसमा उनको जोडी अभिनेत्री साम्राज्ञी राज्यलक्ष्मी शाहसँग बाँधिएको छ ।
कमजोर बन्दै गएको स्टारडम उकास्न आर्यनले आफ्नो जोडीको रुपमा उनलाई चयन गरेको चर्चा सिनेवृतमा छ । ‘ड्रिम्स’ र ‘ए मेरो हजुर २’ को सफलतापछि पछिल्लो पुस्तामा साम्राज्ञीको क्रेज राम्रो छ ।
एकसमय अभिनेता सिग्देलको पनि लोभलाग्दो क्रेज थियो । ‘किस्मत’, ‘कसले चोर्यो मेरो मन’, ‘नोभेम्बर’, ‘क्लासिक’, ‘मेरो एउटा साथी छ’ लगायतका फिल्म बक्सअफिसमा सफल हुँदा उनलाई लिएर फिल्म बनाउन चाहने निर्माता/निर्देशक थोरै थिएनन् ।
चर्को डिमाण्डलाई थेग्न उनी राम्रा कम दर्शक भड्काउने फिल्ममा बढी व्यस्त भए । फलस्वरुप, अहिले आफ्नो स्टारडम फर्काउन आर्यनलाई महाभारतको युद्ध लडे सरह भएको छ । ‘कायरा’ ले युद्ध सफल बनाउँछ वा बनाउँदैन ? त्यसको नतिजा त केही दिनमा नै सार्वजनिक हुनेछ ।
चकलेटी ब्वाई आर्यन र अहिलेकी हटकेक साम्राज्ञीले पहिलो पटक स्क्रिन साझेदारी गरेका कारण यो फिल्मको दर्शकमा घोषणाको बेलैदेखि व्यग्र प्रतिक्षा थियो । गीतसंगीत र ट्रेलरले सकारात्मक प्रतिक्रिया पाएका कारण हलमा दर्शकको उपस्थिति उत्साहजनक हुनेमा निर्माण टिम विश्वस्त देखिएको छ ।
मल्टिप्लेक्समा उच्च शोज पाएको यो फिल्मले देशभरका ८० हलमा आफ्नो वर्चश्व जमाएको छ । ‘कायरा’ का निर्देशक लक्ष्मण रिजाल हुन् । उक्त फिल्ममा शिशिर राणा, हितेश शर्मा, मरिषा श्रेष्ठलगायतका कलाकारहरुको पनि अभिनय छ ।
मल्टिप्लेक्समा एक्लै भएपनि सिंगल थिएटरमा ‘कायरा’ को भिडन्त अभिनेता अनुप विक्रम शाही स्टारर फिल्म ‘झमक बहादुर’ सँग परेको छ । पहिलो ट्रेलर सार्वजनिक भएपछि यो फिल्म दक्षिण भारतीय फिल्म ‘मुम्बई एक्सप्रेस’ को फोटोकपी रहेको भन्दै चर्को आलोचना भएको थियो ।
सुन तस्करी, लुटपाट र अपहरणलाई फिल्मको मुख्य विषय बनाइएको छ । भोमन कटुवाल निर्देशित तथा मिनकुमार तामाङ निर्मित ‘झमक बहादुर’ मा यादब देपकोटा (सरापे), राजु कमेडी, मिन कुमार तामाङ, कल्याण अधिकारी, सुजाता थापालगायतका कलाकारहरुको अभिनय छ ।
