काठमाण्डौ, ९ मंसिर ।
बुङ्वाखाको १५औं वार्षिकोत्सव समारोहको अवसरमा आयोजित १५औं बान्तावा कविता प्रतियोगितामा उत्कृष्ट १५ कविहरुको कविता सहित नाम सार्वजनिक गरिएको छ । वार्षिकोत्सव कार्यक्रम मंसिर २३ गते काठमाण्डौ स्थित नेपाल प्रज्ञा प्रतिष्ठानको सभाहलमा हुने जनाएको छ ।
प्रतियोगितामा ३५कविहरुले सहभागिता जनाएका मध्ये १५ जना कविका उत्कृष्ट कविता कोडिङ विधिबाट मुल्याङ्कन समितिले छनोट गरिएको हो । छनोट पर्नेमा इलामका अर्जुन वेदना राई, रमेश कुमार राई, पाँचथरका प्रदिप राई, मणिराम राई रहेका छन् भने । सुनसरीका राजेन्द्र राई, धनकुटाका विवेक उदासी, नगेन्द्र राई, भोजपुरका प्रजितकला राई, रामकुमार राई, रामचन्द्र राजालिम, रिया राई, सुभास देव रुङमाहाङ, त्रिलोक त्रिवेणी राई र काठमाण्डौका किवाहाङ राई रहेका छन् ।
छनोटमा परेका १५ कविहरुले वार्षिकोत्सवको अवसरमा कविता वाचन गर्नेछन् । छनोट भएका कविहरु उक्त कार्यक्रममा उपस्थित हुन नसके आयोजकलाई जानकारी गराउँनु पर्ने र उक्त स्थानमा वैकल्पिक छनोटमा परेको कविताले स्थान पाउने छ । बान्तावा कविता प्रतियोगितामा नगर रु १५ हजार सहित प्रमाण पत्र प्रथम पुरस्कार तोकिएको छ भने दोस्रो नगद रु १० हजार सहित प्रमाण पत्र र तेस्रो हुनेले नगद रु ५ हजार सहित प्रमाण पत्र प्राप्त गर्नेछ । उक्त पुरस्कार बुङवाखा श्यामराज दुब्देहाङ स्मृतीकोष बाट प्रदान गरिने जनाएको छ ।
वार्षिकोत्वको अवसरमा विभिन्न विधामा पुरस्कार वितरण
बान्तावा बाषिक पत्रिका बुङवाखाको १५औं बार्षिकोत्वको अवसरमा विभिन्न विधामा पुरस्कार वितरण समेत गरिने जनाएको छ । जसमा :
१. बुङ्वाखा–विष्णु–मकर बान्तावा राष्ट्रिय पुरस्कार–२०७६’
मिक्लाजुङ गाउँपालिका (साविक रवि) पाँचथरमा जन्मिनु भई हाल ललितपुर निवासी प्रा.डा. नोवल किशोर राईलाई यो पुरस्कार प्रदान गरिने भएको छ । उहाँको बान्तावा व्याकरण कृतिको लागि सो पुरस्कार प्रदान गर्ने निर्णय गरिएको हो । साथै, उहाँले बान्तावा भाषामा पहिलोपटक अ डिस्क्रिप्टिभ स्टडी अफ् बान्तावा शीर्षकमा विद्यावारिधि पनि गर्नु भएको छ । पुरस्कारको राशी ताम्रपत्रसहित ५१ हजार २ सय ९१ रुपैयाँ रहेको छ । पूर्व मुख्य अञ्चलाधीश स्व. मकर बहादुर बान्तावा र उहाँकी श्रीमती विष्णुदेवी बान्तावाको सम्मानमा उहाँहरूका परिवारले सो पुरस्कारको लागि बुङ्वाखामा अक्षयकोष स्थापना गर्नुभएको हो।
२. बुङ्वाखा–पञ्च कुमारी सङ्गीत पुरस्कार–२०७६’
बान्तावा गायिका लीला राईलाई यो पुरस्कार प्रदान गरिने भएको छ । भोजपुरको होम्ताङमा जन्मिनु भई हाल इटहरीमा बसिरहनु भएको गायिका राईले हालसम्म एक दर्जन जति बान्तावा गीतहरू गाउनु भएको छ । कदरपत्रसहित पुरस्कारको राशी रु. ३५ हजार रहेको छ । स्वर्गीय आमा पञ्च कुमारी राईको स्मृतिमा दाजुभाइद्वय गीतकार जीवन मुकारुङ र गायक तथा सङ्गीतकार अशोक मुकारुङले सो पुरस्कारको लागि अक्षयकोष स्थापना गर्नुभएको हो ।
३. बुङ्वाखा–रनमाया चेन्चेक्वा पुरस्कार–२०७६’
सन्दकपुरका गाउँपालिका २, माइमझुवा इलाममा जन्मिनु भई बुङ्वाखाको काठमाडौं संवाददाता तथा इन्डिजिनियस टेलिभिजन र रेडियो कान्तिपुरमा बान्तावा कार्यक्रम सञ्चालक रीता राराहाङ राईलाई यो पुरस्कार प्रदान गरिने भएको छ । बुङ्वाखा सल्लाहकार चन्द्र कुमार हतुवाली र उहाँको परिवारले आफ्ना बजु रनमाया राईको स्मृतिमा स्थापना गर्न लाग्नु भएको कदरपत्रसहित सो पुरस्कारको राशी रु. ६ हजार रहेको छ ।
४. बुङ्वाखा–धनेन्द्र बादिहाङ स्मृति पुरस्कार–२०७६’
भोजपुरमा जन्मिनु भई हाल काठमाडौं निवासी बुङ्वाखाका नियमित स्तम्भकार भक्त बहादुर रुछेन्बुङ राईलाई यो पुरस्कार प्रदान गरिने भएको छ । आफ्ना भाइको अल्पायुमै स्वर्गारोहण भएकोमा दाजु टीकाराम बादिहाङ राईको पहलमा यो पुरस्कार स्थापना गरिएको हो । कदरपत्रसहित पुरस्कारको राशी रु. ५ हजार रहेको छ ।
