मेचीनगर, २० मंसिर ।
किरात याक्थुङ चुम्लुङ मेचीनगर–५ ले लिम्बुहरुको महान् चाड चासोक ताङनामको अवसरमा बृहत साँस्कृतिक साँझ तथा रमाइलाे मिनी मेलाकाे आयोजना गर्ने भएकाे छ । मंसिर २६ गते देखी २८ गते सम्म मेचीनगर–५ मा रहेकाे माङ्हिम परिसरमा कार्यक्रम हुने शुक्रबार पत्रकार भेटघाट कार्यक्रमकाे आयोजना गरी जानकारी गराएकाे हाे ।
संस्थागत रूपमा किरात याक्थुङ चुम्लुङ लिम्बु समुदायको भाषा, लिपि, कला, संस्कार संस्कृति रीतिरीवाजको समग्र रूपमा जगेर्ना गर्दै संरक्षण र संवर्धनमा लागेकाे किरात याक्थुङ चुम्लुङ मेचीनगरका अध्यक्ष दिलीपजंग आङदेम्बेले बताए । उनले भने– संस्कार संस्कृतिका कुराहरू युवा पुस्तालार्इ अपनत्व प्रदान गर्दै उत्तरदायी बनाउने उदेश्यले पनि हामीले यस कार्यक्रमकाे आयोजना गरेका हाै ।
तीन दिने मेलाको पहिलो दिन साँस्कृतिक विधा तर्फका साँस्कृतिक झाँकीसहित विविध कार्यक्रम हुने । दोस्रो दिन राष्ट्रिय स्तरका ख्यातिप्राप्त कलाकारहरूकाे प्रस्तुतीसँगै स्थानिय कलाकारहरूकाे समेत प्रस्तुती रहने र मेलाकाे अन्तिम दिन लिम्बु जातिको साँस्कृतिक खेल छेलो, तिर धनुष लगायत, स्लो बाइक रेसिङ लगायतका मनाेरञ्जनात्मक खेलहरू हुने आयोजक समितिले जनाएकाे छ ।
कार्यक्रममा गायीका रजिना रिमाल, गायक तथा संगीतकार उत्तमजंग लावती, छमछमी सिजन ४ का सेकेण्ड रनरअफ दीलमाया लिम्बुसहित स्थानीय कलाकारहरुको समेत प्रस्तुती रहने छ । महोत्सव सम्पन्न गर्न करीव २ लाख रुपैयाँ खर्च अनुमान गरिएको र उक्त रकम दाताहरुबाट संकलन गरिने बताइएको छ ।
चासोक तङनाम रमाइलो मिनी मेला आयोजक समितिका अध्यक्ष अमृत लावतीको सभापतित्वमा भएको पत्रकार सम्मेलनमा कार्यक्रम सञ्चालन भूमीका सुब्बाले गरेकी थिईन् । मेलामा रोटेपीङसहित बालबालिकाहरुका लागि मनोरञ्जनका खेल सामग्री राखिने छ ।
