८ जेठ, दमक ।
झापाको कमल गाउँपालिकामा गठबन्धनतर्फबाट नेपाली कांग्रेसका हुकुमसिंह राई विजयी भएका छन् । अघिल्लो निर्वाचनमा गोला प्रथामा हारेका राईले यस पटक भने पालिका अध्यक्षमा सहज बाजी मारेका हुन् ।
राईले एमाले उम्मेद्वार भीम राईलाई २९१५ मतान्तरले पाखा लगाएका छन् ।
हुकुमसिंहले १२५६८ मत ल्याएर पालिका अध्यक्ष विजयी भए भने उनका प्रतिद्वन्द्वी एमालेका भीमले ९६५३ मत प्राप्त गरे ।
पालिका उपाध्यक्षमा भने एमालेकी प्रमिला न्यौपानेले बाजी मारेकी छिन् । उनले १०८४५ मत पाएर विजयी भइन् भने गठबन्धनतर्फबाट नेकपा माओवादी केन्द्रका पर्शुराम सुवेदीले ८३७१ मत मात्र पाए । सुवेदीलाई २४७४ मतान्तरले पाखा लगाउँदै न्यौपानेले जित दर्ज गरिन् ।
७ वटा वडा रहेको कमल गाउँपालिकामा एमाले एक्लैले बहुमत अर्थात ४ वटा वडामा जित निकालेको छ भने ३ वटा वडामा गठबन्धनले जितेको छ ।
कांग्रेसका राई गत २०७४ को स्थानीय तह निर्वाचनमा ८ हजार २७५ मत ल्याएर एमालेकी मेनुका काफ्लेसँग बराबरीमा पुगे पनि गोला प्रथामा पराजित भएका थिए ।
