११ असार, दमक ।
नेपालमा पछिल्लो २४ घण्टामा थप २७ जनामा कोरोना भाइरस संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार शनिबार गरिएको ९ सय ३७ पीसीआर परीक्षणमा २३ जना र ८ सय ६५ एन्टिजेन परीक्षणमा ४ जना गरी २७ जनामा संक्रमण पुष्टि भएको हो ।
संक्रमितहरुमा १३ जना काठमाडौं उपत्यकाका र अरु उपत्यका बाहिरका रहेका बताइएको छ ।
योसँगै देशभर कोरोना भाइरसको सक्रिय संक्रमितको संख्या १ सय ८८ पुगेको छ । ती मध्ये १ सय ८१ जना होम आइसोलेसनमा बसेका छन् भने ७ जना अस्पतालमा उपचाररत छन् ।
अस्पतालमा उपचाररतमध्ये ४ जनाको आईसीयूमा राखेर उपचार भइरहेको स्वास्थ्य मन्त्रालयले जनाएको छ ।
पछिल्लो २४ घण्टामा कोरोना भाइरस संक्रमणमुक्त हुनेको संख्या १६ रहेको छ । पछिल्ला दिनमा कोरोना संक्रमित कसैको पनि ज्यान गएको छैन ।