३१ असार, दमक ।
जनता समाजवादी पार्टी (जसपा)बाट पदमुक्त गरिएका डा. बाबुराम भट्टराईले उपेन्द्र यादवलाई स्वेच्छाचारीको आरोप लगाएका छन् ।
शुक्रबार विज्ञप्ति जारी गर्दै जसपाको संघीय परिषद् अध्यक्षबाट बिहीबार मात्रै पदमुक्त भएका भट्टराईले यस्तो आरोप लगाएका हुन् । उनले आफूहरुमाथि गरेको भनिएको कारबाही खारेज गर्ने चेतावनीसमेत दिएका छन् ।
आफ्नो अध्यक्षतामा राजधानीको जडिबुटीमा सम्पन्न केन्द्रीय समितिको विस्तारित बैठक पार्टी रूपान्तरणका प्रयत्न गर्नका लागि भएको दावी गर्दै भट्टराईले विरगञ्जमा यादवको अध्यक्षतामा बसेको जसपाको बैठकलाई अवैधानिक, अराजनीतिक र अनैतिक भनेका छन् ।
संघीय परिषद् अध्यक्षबाट आफूलाई पदमुक्त गर्ने र आफू पक्षधर केन्द्रीय कार्यकारिणी सदस्यहरूलाई पदमुक्त गर्ने जसपा बैठकको निर्णयको भत्र्सना गर्ने र कारबाहीको निर्णय खारेज गर्ने भट्टराईको जिकिर छ ।
अध्यक्ष यादवको स्वेच्छाचारी कार्यशैलीविरुद्धको वहस उत्कर्षमा पुगेको र पार्टीभित्र केन्द्रीय समितिको अलग–अलग बैठक गर्ने तहसम्म पुगेको विज्ञप्तिमा उल्लेख छ ।
भट्टराई पक्षधरले केन्द्रीय समितिको विस्तारित बैठकका नाउँमा असार २८ र २९ गते राजधानीको जुडबुटीमा भेला गरेका थिए ।
यादवको अध्यक्षतामा विरगञ्जमा असार २९ र ३० गतेको बसेको जसपा केन्द्रीय समिति बैठकले अध्यक्षले प्रयोग गर्ने अधिकार प्रयोग गरी बैठक बोलाउने काम गरेको, नयाँ पार्टी खोल्ने निर्णय गरेको आरोपसहित संघीय परिषद् अध्यक्ष बाबुराम भट्टराईलगायतलाई कारबाही गरेको थियो ।
उनीसहित कार्यकारिणी समिति सदस्यहरु हिसिला यमी, महिन्द्र राय यादव, गंगानारायण श्रेष्ठ, डम्बर खतिवडा, दुर्गा सोव, प्रशान्त सिंह, रमेश यादव, भक्तबहादुर साह र दानबहादुर चौधरीलाई विरगञ्ज बैठकले पदमुक्त गरेको थियो ।
भट्टराईबाट जारी विज्ञप्तिमा भनिएको छ –‘हामी यस कारबाहीको घोर भत्सर्ना गर्दै कारबाहीको निर्णय खारेज गर्दछौंं । यो परिस्थितिमा अब हाम्रो सामु पार्टी पुनर्गठनको विकल्प रहेन । तसर्थ, पार्टी रूपान्तरणका लागि अनवरत रूपमा लागिरहनु भएका केन्द्रीय सदस्यहरूलगायत तहगत रूपमा सबै तहका नेताकार्यकर्ताहरूलाई पार्टी पुनर्गठनका लागि हार्दिक अपिल गर्दछौँ ।’
पार्टी शक्ति र गणितमा उपेन्द्र नै माथि
विरगञ्जमा आयोजित जसपा केन्द्रीय समिति बैठकमा ३ सय ७ जना केन्द्रीय सदस्यको उपस्थिति रहेको जसपा केन्द्रीय कार्यालय बालकुमारीले जनाएको छ ।
पार्टी केन्द्रीय कार्यालयका अनुसार भट्टराई पक्षले डाकेको जडिबटीको विस्तारित बैठकमा २ सय बढी केन्द्रीय सदस्य उपस्थित भएको हवला दिइए पनि ७० जनाको मात्र उपस्थिति रहेको थियो ।
निर्वाचन आयोगमा अध्यावधि गरिएका ४ स सय ९९ जना केन्द्रीय सदस्यमध्ये स्थानिय तह निर्वाचनमा टिकट नपाएर पार्टी परिवर्तन गरेका र अन्य विभिन्न कारणले गरी १ सय २२ जना भने दुवै बैठकमा उपस्थित भएनन् ।
जसपाका ३४ जना केन्द्रीय कार्यकारिणी समिति सदस्यमध्ये यादवको पक्षमा २० जना रहेका खुलेको छ ।
पार्टी पुनर्गठनको लागि भन्दै डाकिएको भट्टराई पक्षधरको भेलामा ७ जना केन्द्रीय कार्यकारिणी समितिका सदस्य सहभागी थिए ।
दुवैतिरको बैठक र भेलामा ५ जना केन्द्रीय कार्यकारिणी समिति सदस्यहरु अनुपस्थित रहेका थिए भने यसअघि प्रदेश नम्बर १ मा प्रदेश प्रमुख नियुक्त भएका परशुराम खापुङ र साउदी अरबको राजदूत नियुक्त भएकाले नवराज सुवेदीले केन्द्रीय कार्यकारिणी समितिबाट राजीनामा दिइसकेका छन् ।
जसपाको २० जना संघीय सांसद रहेकोमा यादव पक्षमा उनीसहित १६ र भट्टराई पक्षमा उनीसहति ३ जना छन् ।
समानुपातिक सांसद रहेकी रेणु यादव हालै मन्त्रीबाट पदमुक्त गरिएपछि राजीनामा दिएर बकेकी छन् । उनी कता लाग्ने वा उनको सांसद् पद रहने नरहने बारे हालसम्म स्पष्ट भएको छैन ।
