२४ माघ भद्रपुर । प्रथम भद्रपुर झापा गोल्डकप २०७९ र चौधरी ग्रुपको उत्पादन मुस्ताङबीच मुख्य प्रायोजक (टाइटल स्पोन्सर) का रुपमा सम्झौता हस्ताक्षर भएको छ ।
आज भद्रपुरस्थित होटल आनीको सभाहलमा भएको सम्झौतापत्रमा भद्रपुर झापा गोल्डकपका अध्यक्ष दिपेश ढकाल र मुस्ताङका तर्फबाट नेसनल सेल्स हेड युवराज खत्रीले हस्ताक्षर गरे । हस्ताक्षरसँगै अब ‘मुस्ताङ भद्रपुर झापा गोल्डकप’ को रुपमा प्रतियोगिता सञ्चालन हुनेछ ।
रंगशालामा करिब २० हजार दर्शक बस्न सक्नेगरी स्थायी प्यारापिटको मर्मत तथा रङरोगन कार्य सम्पन्न भइसकेको छ । त्यस्तै, बाँसको अस्थायी प्यारापिट पनि निर्माण कार्य पनि अन्तिम चरणमा पुगेको छ ।
प्रथम भद्रपुर झापा गोल्डकपको विजेताले नगद १३ लाख र उपविजेताले नगद ७ लाख रुपैयाँ प्राप्त गर्नेछ । गोल्डकप सम्पन्न गर्न एक करोड ५० लाख रुपैयाँ खर्च लाग्ने अनुमान गरिएको छ ।
प्रतियोगिता भरिको सर्वोत्कृष्ट खेलाडी प्लेयर अफ द टुर्नामेन्टले नगद एक लाख १ हजार पाउनेछ । त्यस्तै, उत्कृष्ट गोल किप्पर, उच्च गोलकर्ता, उदीयमान खेलाडी र प्रशिक्षकले नगद २५ हजार पाउने आयोजकले जनाएको छ । प्रत्येक खेलको प्लेयर अफ द म्याच १० हजार रुपैयाँ दिइनेछ ।
प्रतियोगितामा आयोजक भद्रपुर झापा ११, नेपालका तीन विभागीयसहित ६ वटा डिभिजन क्लब र भारत, भुटान र बंगलादेशका तीन विदेशी क्लबको सहभागिता रहने झापा गोल्डकपका अध्यक्ष ढकालले बताए । केही दिनमै खेलतालिका सार्वजनिक गरिने उनले बताए । भद्रपुर नगरपालिका विधालयका बिधार्थिहरु,सिनियर सिटिजन र फरक क्षमता भएका व्यक्तिहरुका लागि प्रवेश निशुल्क रहेको र निशुल्क पार्किंगको सुबिधा रहने पनि बताए ।
भद्रपुर झापा गोल्ड कप संग सहकार्य गर्न पाउँदा खुसि लागेको सिजी ब्रुवरीका नेसनल हेड सेल्स युवराज खत्रीले बताए ।
ऐतिहासिक मेची रंगशालाको पहिचानलाई स्थापित गर्नका निम्ति र संरक्षण गर्नका लागि यो प्रतियोगिताको आयोजना गरिएको कार्यक्रममा संरक्षक भद्रपुर नगरपालिकाका नगरप्रमुख गणेश पोखरेलले बताए ।
प्रतियोगिता यही फागुन ७ गतेदेखि १६ गतेसम्म भद्रपुर–८ मा रहेको मेची रंगशालामा हुनेछ ।
