adv

झापा लिग : भद्रपुर र कचनकवल बराबरी, कमललाई प्रतियोगिताबाटै निकालियो

१४ मंंसिर, भद्रपुर ।


झापाको भद्रपुरमा जारी ओम साई पाथिभरा हस्पिटल प्रथम अन्तर पालिकास्तरीय लिग तथा नकआउट फुटबल प्रतियोगिताको आफ्नो दोस्रो खेलमा भद्रपुर र कचनकवलले बराबरी खेलेसँगै नतिजा रोमाञ्चक बनेको छ ।

बिहीबारको बराबरी नतिजाले कचनकवल समूह ‘ग’ को दोस्रो स्थानमा उक्लिएको छ भने भद्रपुर तेस्रो स्थानमा पुगेको छ । समान दुई खेल खेलेका यी दुवै टिमले अब एक–एक खेल खेल्न बाँकी छ ।

कचनकवलले अन्तिम खेल ६ अंक रहेको शीर्ष स्थानको मेचीनगरसँग खेल्नेछ भने १ अंक मात्र रहेको भद्रपुरले १ अंक रहेको अन्तिम स्थानको बाह्रदशीको सामना गर्नेछ । बाह्रदशी गोलअन्तरले भद्रपुर भन्दा एक स्थान तल छ ।

आजको पहिलो खेलको सुरुवाती अग्रता भद्रपुरले लिए पनि त्यसलाई कायम राखिराख्न नसक्दा कचनकवलले बराबरी गरेको थियो ।

खेलको १७ औँ मिनेटमा भद्रपुरका निवाङ लिम्बूले गरे पनि ६९ औँ मिनेटमा कचनकवलका सुगम राईले गोल गर्दै खेल बराबरीमा पुर्याएका थिए ।

खेलको प्लेयर अफ दी म्याच कचनकवलका कप्तान रामबाबु शाह भए । उनलाई गोल्डकपका अध्यक्ष दिपेश ढकाल, महासचिव जीवनकुमार श्रेष्ठ, भद्रपुर जेसीजका पूर्वअध्यक्ष प्रकाश भण्डारीले नगद दुई हजार र ट्रफी प्रदान गरे ।

यसैबीच, बिहीबारको दोस्रो खेलमा अर्जुनधारा विजयी बन्यो । अर्जुनधाराले कमल गाउँपालिकालाई हराएसँगै समूह ‘घ’ को नतिजा पनि रोमाञ्चक बनेको छ ।

खेलको अन्तिम पाँच मिनेटअघि कमलका खेलाडीले मुख्य रेफ्री डिकबहादुर श्रेष्ठलाई हातपात तथा कुटपिट गरेका थिए । कुटपिटबाट श्रेष्ठ घाइते बनेका छन् ।

कमलका कप्तान लक्ष्मण बेघा, गोलकिपर उत्तम कार्की र प्रशिक्षक चित्रमान राईले रेफ्री श्रेष्ठलाई हातपात गरेपछि रातो कार्ड खाएका थिए ।

कार्ड पाएपछि कमलले खेल नखेल्ने भन्दै मैदान छोडेपछि अर्जुनधारालाई विजयी घोषणा गरिएको थियो । आयोजक र अफिसियलहरुले मैदान नछोड्न आग्रह गरे पनि कमलले मानेन ।

बिहीबारको जितसँगै अर्जुनधारा आफ्नो समूहको पहिलो स्थानमा चढेको छ । उसको ४ अंक पुगेको छ ।

यसअघि खेलको २८ औँ मिनेटमा अर्जुनधारका निखिल तामाङले गोल गरेका थिए । तर, ३८ औँ मिनेटमा कमलका नरबहादुर मगरले गोल फर्काउन सफल भएका थिए ।

अर्जुनधाराले अन्तिम खेल अंकविहीन रहेको दमकसँग प्रतिस्पर्धा गर्नेछ भने एक खेल खेल्न बाँकी रहेको कमललाई प्रगियोगिताबाटै निलम्बन गरिएको छ । खेल नियमविरुद्ध रेफ्रीमाथि कुटपिट गरेको कारण कमललाई बाँकी खेलमा प्रतिबन्ध लगाइएको हो ।

प्रतियोगितमा अब झापाका १३ वटा पालिका र आयोजकको भद्रपुर ब्लेजर्स टिम गरी १४ वटा टिमले प्रतिस्पर्धा गर्दै छन् ।

१८ दिनसम्म सञ्चालन हुने प्रतियोगिताको फाइनल खेल मंसिर २४ गते हुने महासचिव जीवनकुमार श्रेष्ठले जानकारी दिए ।

प्रतियोगिताको विजेताले नगद ३ लाख, ट्रफी, मेडल र प्रमाणपत्र पाउनेछ भने उपविजेताले नगद २ लाख, ट्रफी, मेडल र प्रमाणपत्र प्राप्त गर्नेछ ।

प्रत्येक खेलको प्लेयर अफ द म्याचले नगद २ हजार रुपैयाँ पाउने छन् । त्यस्तै, उत्कृष्ट गोल किपर, उत्कृष्ट प्रशिक्षक, उच्च गोलकर्ता र उदीयमान खेलाडीले नगद पाँच हजार रुपैयाँ, ट्रफी र मेडल प्राप्त गर्ने छन् । प्रतियोगिता सम्पन्न गर्न ८० लाख रुपैयाँ खर्चको अनुमान गरिएको छ ।

Advertise Expired !

Leave a Reply

सम्बन्धित शीर्षकहरु