२ माघ, दमक ।
प्रधानमन्त्री पुष्पकमल दाहाल ‘प्रचण्ड’को स्वकीय सचिवालयबाट १३ जनालाई हटाइएको छ ।
एक वर्षे कार्यकालको समीक्षापछि प्रधानमन्त्री दाहालको स्वकीय सचिवालयबाट १३ जना हटाएका हुन् ।
प्रधामनन्त्रीका प्रमुख स्वकीय सचिव सन्तु दरैका अनुसार १ माघदेखि लागू हुनेगरी सचिवालयका एक स्वकीय सहसचिव, ४ जना स्वकीय उपसचिव, एक स्वकीय शाखा अधिकृत, दुई जना प्रशासन सहायक, दुई जना कम्प्युटर सहायक र दुई जना हलुका सवारी चालक जिम्मेवारी मुक्त गरिएका हुन् ।
माघ १ बाट स्वकीय सहसचिव नारायणप्रसाद ढुंगाना, स्वकीय उपसचिवहरु रमेशप्रसाद गुरागाईं, ओमकुमारी पौडेल, सावित्रीकुमारी अधिकारी र कलबहादुर नाथ विदा भएका छन् । त्यस्तै, स्वकीय शाखा अधिकृत लाले कुमाल, प्रशासन सहायकद्वय युवराज शाह र रामलाल पराजुली हटाइएका हुन् ।
सचिवालयबाट हटाइएका अन्यमा कम्प्युटर सहायक बासुदेव शर्मा र खड्क योगी, कार्यालय सहयोगी अविनाश वाइवा, हलुका सवारी चालकहरु रमेशप्रसाद घिमिरे र पवित्रबहादुर शाही छन् ।
‘प्रधामनन्त्री कार्यालयको सचिवसहित विभिन्न पदको दरबन्दी कटौती गरेर चुस्त बनाउने क्रममा सचिवालयमा पनि कटौती गरिएको हो’, प्रमुख स्वकीय सचिव दरैले भने –‘यो प्रधामनन्त्रीको अठोट बमोजिमको सुधारको काम हो ।’
