मेचीनगर । झापाको मेचीनगर नगरपालिका वडा नम्बर १२ माथिल्लो धाइजनस्थित मेची राजमार्गमा भएको सडक दुर्घटनामा दुईजनाको मृत्यु भएको छ ।
मृत्यु हुनेहरुमा स्कुटर चालक झापा बुद्धशान्ति–५ का अन्दाजी २५ वर्षीय लीलाप्रसाद ढुंगेल र सोही स्कुटरमा पछाडि बसेका इलाम रोङ–५ बहुवनका अन्दाजी २९ वर्षीय चेतन रिजाल रहेका छन् ।
हिजो राति १०ः४५ बजेको समयमा मेचीनगर १२ माथिल्लो धाइजनस्थित मेची राजमार्गमा चारआलीबाट बुधबारेतर्फ जाँदै गरेको मे. ७ प ७२८३ नम्बरको स्कुटरले हाइवेको बायाँ किनारमा बिग्रिएर रोकिराखेको को. १ च ७२६४ नम्बरको बोलेरो पिकअपलाई ठक्कर दिएको थियो ।
दुर्घटनामा घाइते भएका दुवैलाई बिएन्डसी अस्पताल बिर्तामोड पुर्याउनसाथ राति ११ बजे चिकित्सकले दुबैजनालाई मृत घोषणा गरेका थिए ।
स्कुटर र बोलेरो पिकअप गाडी प्रहरी चौकी चारआलीको नियन्त्रणमा रहेको र बोलेरो पिकअप चालक सम्पर्कमा नभएको हुँदा खोजतलास भइरहेको जिल्ला प्रहरी कार्यालय झापाले जनाएको छ ।
