गोविन ल्वागुन, शिवसताक्षी । सरकारले नेपाल विद्युत प्राधिकरणका कार्यकारी निर्देशक कुलमान घिसिङलाई पदबाट हटाएको विरुद्धमा पुनर्बहालिको माग सहित प्रदर्शन भएको छ । नेकपा माओवादी केन्द्र, राप्रपा, लिम्बुवान लगायतका प्रतिपक्षी दलहरुले संयुक्त रुपमा शिवसताक्षीको दुधेमा कोण सभा गरेका हुन् ।
कोण सभालाई सम्बोधन गर्दै नेकपा माओवादी केन्द्रका नवनिर्वाचित नगर अध्यक्ष दुर्गा नेम्बाङले कुलमान जस्तो व्यक्तिलाई हटाएर सरकारले निरङ्कुशता देखाएको बताए । उनले उज्यालो नेपालका संवाहक बनेका एउटा कर्तव्यनिष्ठ कर्मचारी माथि यसरी प्रहार गर्नु सारा देशभरिका जनतामाथिको प्रहार भएको बताए ।
त्यस्तै माओवादी केन्द्रका पूर्व नगर अध्यक्ष महेन्द्र भट्टराईले देशका इमान्दार कर्मचारीहरुको विरुद्धमा सरकारले गरेको कदमको भत्सर्ना गरे । सरकारले इमानदारीलाई बर्खास्त गरेर देशमा कर्मचारीहरुले राम्रो काम गर्नु हुँदैन भन्ने सन्देश दिन खोजेको बताए । उनी भन्छन् विचौलियाहरुलाई संरक्षण गरी उच्च ओहोदामा पुर्याउने सरकारनै विचौलियाहरुबाट बनेको स्पष्ट देखिन्छ ।
विरोध सभामा राप्रपाका रुद्रमणी भट्टराई, संघीय लिम्बुवान मञ्चका किरण लिम्बू लगायतले सरकारले आफ्नो गलत कदम सच्याउँदै कुलमानलाई पुर्नबहाली गर्नु पर्ने बताए ।
सोमबार साँझ बसेको मन्त्रिपरिषदको बैठकले घिसिङलाई पदबाट हटाउने निर्णय गरेको थियो ।
घिसिङलाई २०७८ साउन २५ को मन्त्रिपरिषद बैठकले प्राधिकरणको कार्यकारी निर्देशकमा नियुक्त गरेको थियो । उनी २०८२ साउन २४सम्मका लागि नियुक्ति भएका थिए ।
