गोविन ल्वागुन, पाराबारी । झापाको शिवसताक्षी नगरपालिका ३ मा शारीरिक अपांग भएका व्यक्तिहरुलाई पौष्टिक आहार वितरण गरिएको छ ।
वडाको कार्यलयमा भएको पौष्टिक आहार वितरण कार्यक्रममा बोल्दै वडा नम्बर ३ का वडाध्यक्ष भाष्कर न्यौपानेले अशक्त नागरिकहरूको स्वास्थ्य लाई तन्दुरुस्त गराउनको लागि पौष्टिक आहार आवश्यकता रहेको बताएका छन् । उनले थोरै बजेटबाट अपाङ्ग नागरिकहरुलाई सहायक सामग्री दिन सबैलाई नपुग्ने र प्रभावकारी समेत नहुने भएकोले पौष्टिक आहार वितरण गरिएको बताए ।
वडा भित्रका ३४ जनालाई पौष्टिक आहार वितरण गरिएको थियो । लाभग्राहीहरुको तर्फबाट बोल्दै इन्दिरा कटुवाल र नगेन्द्र सुजीले यस्तो कार्यक्रमले निरन्तरता पाउनु पर्नेमा जोड दिए ।
हाल वडामा सामाजिक सुरक्षा भत्ता बुझ्ने लाभग्राही संख्या ३४ जना रहेको र अपाङ्गता संख्या भने ५० जनाको हाराहारीमा रहेको वडाकार्यलयले जनाएको छ ।
वडाको सिलिङ बजेट बाट विनियोजित ५० हजार आर्थिक सहयोगमा हर्लिक्स, जुस, सर्बोतम पिठो, बिस्कुट लगायतका पौष्टिकआहार वितरण गरिएको वडा सचिव बिनिषा बास्कोटाले जानकारी दिइन । कार्यक्रममा वडा सदस्यहरु तिर्था दर्जी, लासाङ दोर्जेतामाङ, शंकर राईले शुभकामना मन्तव्य राखेका थिए ।
वडाध्यक्ष भाष्कर न्यौपानेको अध्यक्षतामा भएको कार्यक्रमको स्वागत मन्तव्य वडा सदस्य मुनाकुमारी तामाङले गरेकी थिइन् भने सञ्चालन वडा सचिव बिनिसा बास्कोटाले गरेको थिइन ।
