गोविन ल्वागुन, विर्तामोड । नेकपा(एकीकृत समाजवादी) झापाले शनिबार गिरीबन्धु चिया बगानमै पदाधिकारी बैठक सम्पन्न गरेको छ । विर्तामोडमा रहेको गिरीबन्धु चिया बगानको भूमि भष्ट्रचारका विषयमा सरकार र सरोकारवालाको गम्भिर ध्यानाकर्षण गराउने उदेश्यले एकीकृत समाजवादी झापाले बैठकको आयोजना गरेको हो ।
एकीकृत समाजवादी झापाका अध्यक्ष बिपी भट्टराईले झापालाई बदनाम हुने राजनीतिक घटनाहरुको भत्सर्ना गर्दै पछिल्लो समय झापावासीको हैसियतले जिल्ला बाहिर परिचय दिनसमेत निकै सकस बन्नुपरेको बताए । उनले गुण्डाराज र भष्ट्रचार विरुद्ध भण्डाफोर गर्दै त्यस प्रकारका कार्यमा जोडिएका व्याक्तिलाई जनताबीच सार्वजनिक गर्ने एकीकृत समाजवादी जिल्ला कमिटी झापाको आगामी योजना रहेको समेत बताए ।
बैठकमा बोल्दै भट्टराईले गिरीबन्धु चिया बगानको जग्गा प्रकरण होस या भुटानी शरणार्थी प्रकारणले होस, झापालाई नकारात्मक दृष्टिकोणले हेर्ने गरेको अनुभव र भोगाई रहेको बताए । उनले एमाले–कांग्रेससहितको सरकारले गिरीबन्धु चिया बगानको भूमि प्रकरण सम्बन्धि चासो नदेखाएकोले सांङकेतिक विरोध स्वरुप बैठकलाई गिरीबन्धु चिया बगानमा आयोजना गरेको जानकारी दिए ।
बैठकमा केन्द्रीय सदस्य तथा झापाका सह–इन्चार्ज निलमणी बरालले पछिल्लो समय मुलुक चरम भष्ट्रचारको दलदलमा भाषिएकोले राजनीति पार्टीहरु र नेतृत्वप्रति जनता उदासिनता बनिरहेको बताए । उनका अनुसार पार्टीको बैठक जिल्ला कार्यलयमा नगरेर गिरीबन्धु चिया बगानमै सम्पन्न गरेर राजनीति घटनाक्रममा नौलौ काम गरेको हो ।
त्यसैगरी निवर्तमान अध्यक्ष बेदराज रेग्मीले एकीकृत समाजवादी झापाले एमाले, कांग्रेस, माओवादी लगायतका दलहरुलाई दनक दिएको बताए । उनले गिरीबन्धु चिया बगान जग्गा प्रकरण सम्बन्धि राजनीतिक सभा, समारोह र मिडियाहरुमा ठूलाठूला तर्क गरेपनि दलहरुका नेतृत्वले व्यवहारिक हिसाबले काम गरेर देखाउन नसकेको चिन्ता व्यक्त गरे ।
बैठकमा पार्टी प्रदेश कमिटी सदस्य श्रीप्रसाद सिटौला, शुसिला तिवारी बराल लगायतको उपस्थिति थियो । बैठकको सहजिकरण जिल्ला कमिटी सचिव सानु कुमार लामाले गरेका थिए । बैठकमा उठेका विषयमाथि उपसचिवद्धय श्रीप्रसाद मिश्र र उदय बराइले टिपोट गरेको थियो।
