काँकरभिट्टा । पाँचौ मेचीनगर गोल्डकपको २४ लाख बढी नाफा भएको छ । आज काँकरभिट्टा फुटबल ट्रेनिङ सेन्टर मेचीनगरले पत्रकार सम्मेलन गरी गोल्डकपमा नाफा भएको जानकारी गराएको हो ।
गएको फागुन २४ गतेदेखि चैत २ गतेसम्म काँकरभिट्टा खेलमैदानमा सञ्चालन भएको पाँचौ मेचीनगर गोल्डकप २०८१ मा आयोजकले २४ लाख ६१ हजार ४ सय १४ रुपैयाँ नाफा गरेको छ ।
प्रतियोगिताको आय व्याय सार्वजनिक गर्न सोमवार काँकरभिट्टाको होटल रियाजमा आयोजना गरेको पत्रकार सम्मेलनमा प्रतियोगिताको आर्थिक समिति संयोजक बिमल आचार्यले कुल १ करोड ६२ लाख ८ हजार २०१ रुपैयाँ आम्दानी तथा ९० लाख ६७ हजार ७८६ सय रुपैयाँ विभिन्न शीर्षकमा खर्च भई कुल २४ लाख ६१ हजार ४१५ रुपैयाँ नाफा गरेको प्रतिवेदन सार्वजानिक गरेका थिए ।
गोल्डकपले यस वर्षदेखी संस्थापक सदस्य बन्न पनि आव्हान गरेको थियो । जम्मा तीन सय २७ जना गोल्डकपको संस्थापक सदस्य बनेका छन् । जसबाट जम्मा ३२ लाख ७० हजार जम्मा भएको छ । र अन्यबाट ७३ लाख ५८ हजार २०१ रूपैँया संकलन भएको छ ।
सम्पुर्ण सदस्यहरूलाई तथा दाताहरूलाई धन्यबाद दिंदै कोभिडका कारण चार वर्षसम्म हुन नसकेको गोल्डकप सम्पुर्ण खेलप्रेमी महानुभावहरूको साथ र सहयोगले सम्भव र सफल भएको आयोजक समितिका कोषाध्यक्ष गंगालाल गुरूङले बताए ।
पाँचौ प्रतियोगिता सम्पन्न गर्न दाता तथा सदस्य शुल्कबापतको कुल ६ लाख एक हजार रुपैयाँ समेत संकलन हुन बाँकी छ । यो सार्वजनिक गरेको हिसाबमा समावेश गरेको रकम हो ।
पाँचौ मेचीनगर गोल्डकप आयोजक समितिका संयोजक श्रीप्रसाद मैनालीको अध्यक्षकतामा सम्पन्न कार्यक्रममा स्वागत आयोजक काँकरभिट्टा फुटबल ट्रेनिङ सेन्टरका अध्यक्ष नवराज ओलीले गरेका थिए ।
पाचौँ मेचीनगर गोल्डकपको उपाधि चर्च ब्वाइज युनाइटेडले आयोजक काकरभिट्टा फुटबल ट्रेनिङ सेन्टरलाई १–० ले पराजित गरेर जितेको थियो ।
