‘पशुपतिप्रसाद’ फेम्ड निर्देशक दीपेन्द्र के खनालद्वारा निर्देशित फिल्म ‘द युगदेखि युगसम्म’ बाट अभिनय यात्राको सुरुवात गरेकी अभिनेत्री हुन् अनु शाह । फिल्मभन्दा पहिले उनी म्यूजिक भिडियोमा चिनिने नाम बनिसकेकी थिइन् ।
सय बढी म्यूजिक भिडियोमा अभिनय गरिसकेकी उनले ‘मिलाप’, ‘नागरिक’, ‘भैरव’, ‘बाजिगर’, ‘लक्ष्य’, ‘ठेगाना’, ‘धर्मा’ लगायत २ दर्जन बढी फिल्ममा काम गरिसकेकी छन् । यीमध्ये ‘भैरव’ मात्र बक्सअफिसमा सफल रहेको थियो । अन्य फिल्म कहिले आए कहिले गए उनी स्वयंलाई अत्तोपत्तो भएन ।
‘भैरव’ हिट भएपछि अनुको करिअर उभो लाग्ने धेरैको विश्वास छ । यसपछि, उनका केही फिल्म रिलिज पनि भए तर, बक्सअफिसमा सफल नहुँदा अहिले अनु हराए जस्तै छिन् । झण्डै १ वर्ष भयो उनी पर्दामा देखिएकी छैनन् ।
गएको केही वर्ष अगाडि हरेक हप्ता उनले अभिनय गरेका नयाँ फिल्मका पोस्टर भित्तामा फेरिने गरेका थिए । यसले उनलाई पूरै अस्तव्यस्त बनाएको थियो । अनुलाई पैसामुखी भएको आरोप समेत लाग्यो ।
अहिले त हातमा नयाँ फिल्म नै नभएको चर्चा सिनेवृतमा छ । हरेक दिन म्यूजिक भिडियो गरिरहनुले पनि यो कुरालाई थप मलजल गर्छ । अचेल दिनहुँ तीज गीतको भिडियोमा भ्याइनभ्याइ उनले राम्रो स्क्रिप्ट नआएका कारण फिल्म नगरेको बताएकी छन् ।
उनी भन्छिन्,’ १ वर्ष भइसक्यो फिल्म गरेको छैन । अहिले केही फिल्ममा कुरा हुँदैछ । धेरै फिल्म पनि गरेँ । एक एक हप्तामा पनि रिलिज भए । अब चाहिं ग्याप लिन खोजिरहेको छु ।’
उनले अब फिल्म छनौटमा चुजी हुने बताइन् । ‘अब राम्रो स्क्रिप्ट आए मात्र फिल्म गर्छु भनेर बसेको छु । राम्रो प्रोजेक्ट नआएसम्म बरु म्यूजिक भिडियो नै गर्दै जान्छु’, उनले भनिन् । पछिल्लो समय उनी अभिनेता सविन श्रेष्ठसँगको अफेयरका कारण खुब चर्चामा छिन् ।
गएको वर्ष यी दुईले विवाह गरिसकेको खबर समेत बाहिर आएको थियो । पछि उनीहरुले यो कुरालाई अफवहा भन्दै प्रेमको रथमा सफर गरिरहेको रहस्यको भने पर्दाफास गरेका थिए ।
