मंसिर १६, माङसेबुङ । इलामको माङसेबुङमा जारी आत्मानन्द गोल्डकप २०८१ को फाइनल खेल मंसिर १७ गते सोमबार साबिक विजेता तिजोक युवा क्लब पाँचथर र दुधे युथ क्लब झापाबीच हुनेछ ।
जिल्लाको प्रतिष्ठित फुटबल प्रतियोगिताको पहिलो सेमिफाइनल खेलमा सिरिजङ्गा स्पोर्टिङ क्लब मोरङलाई २–० गोल अन्तरले हराउदै दुधे फाइनल प्रवेश गरेको थियो । यसैगरी दोस्रो सेमिफाइनल खेलमा दमक भाङबारी स्पोर्टिङ क्लब झापालाई २–० गोलले हराउदै तिजोक उपाधि नजिक पुगेको हो । तिजोक गत संस्करणको विजेता समेत रहेको छ ।
किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा १७औं आमन्त्रित पुरुष फुटबल प्रतियोगितामा तिजोक र दुधेसहित माङसेबुङ गाउँपालिका इलाम, दमक भाङबारी स्पोर्टिङ क्लब झापा, चुलाचुली स्पोर्टिङ क्लब झापा, सिरिजङ्गा स्पोर्टिङ क्लबमोरङ, आयोजक र भारतको एमएफसी दार्जिलिङको सहभागीता रहेको थियो ।
मंसिर ९ बाट सुरु भएको प्रतियोगिताको विजेताले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र पाउनेछन् भने उपविजेताले नगद दुई लाख पाँच हजार एक सय ७१ रुपैयाँ सँगै ट्रफि, मेडल र प्रमाणपत्र प्राप्त गर्नेछन् ।
व्यक्तिगत विधातर्फ म्यान अफ द म्याच सहित सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपर, उदीयमान खेलाडी र उत्कृष्ट प्रशिक्षकले आकर्षक पुरस्कार प्राप्त गर्नेछन् ।
यस अवसरमा फुटबलसँगै म्याराथन, पक्लुङ(छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायत खेलहरु समेत हुने आयोजकले समितिले जानकारी दिए ।
