मंसिर १४, माङसेबुङ । साबिक विजेता तिजोक युवा क्लब आत्मानन्द गोल्ड कप २०८१ को फाइनल पुगेको छ । इलाम जिल्लाको प्रतिष्ठित फुटबल प्रतियोगिताको दोस्रो सेमिफाइनल खेलमा दमक भाङबारी स्पोर्टिङ क्लब झापालाई एकका विरुद्ध दुई गोल गर्दै तिजोकले उपाधि भिडन्त पक्का गरेको हो ।
तिजोकले उपाधिका लागि मंसिर १७ गते दुधे युथ क्लब झापासँग खेल्नेछ ।
शुक्रबार माङसेबुङ ५ स्थित प्रस्तावित आत्मानन्द खेल मैदानमा भएको खेलको १८औं दमकमा अशोक खवासले रेड कार्ड पाउदै मैदान छाडेका थिए । आठ खेलाडीमा समेटिएको दमक विरुद्ध पहिलो हाफको अतिरिक्त समयमा निर्देश राईले गोल गर्दै तिजोकलाई सुरुवाती अग्रता दिलाएका थिए । त्यसपछि दोस्रो हाफको अतिरिक्त समयमा निर्देश राईले व्यक्तिगत दोस्रो गोल गर्दै अग्रता दोब्बर बनायो । तरखेल सकिनै लाग्दा दमक भाङबारीका लागि रोहन भुजेलले गोल गर्दै खेलमा फर्कने संकेत गरेपनि पर्याप्त हुन सकेन ।
खेलको मेन अफ दी म्याच तिजोकका लागि दुई गोल गरेका निर्देश राई घोषित भए । उनले नगद पाँच हजार ७१ रुपैयाँ सहित ट्रफी, मेडल हात पारे ।
किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा १७औं आमन्त्रित पुरुष फुटबल प्रतियोगितामा तिजोक र दमकसहित माङसेबुङ गाउँपालिका इलाम, दुधे युथ क्लब झापा, चुलाचुली स्पोर्टिङ क्लब झापा, सिरिजङ्गा स्पोर्टिङ क्लब मोरङ, आयोजक र भारतको एमएफसी दार्जिलिङको सहभागीता रहेको छ । प्रतियोगिता मंसिर ८ देखि १७ गते सम्म सञ्चालन हुनेछ ।
विजेताले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र पाउने छन् भने उपविजेताले नगद दुई लाखपाँच हजार एक सय ७१ रुपैयाँ सँगै ट्रफि, मेडल र प्रमाणपत्र प्राप्त गर्नेछन् ।
व्यक्तिगत विधातर्फ म्यान अफ द म्याच सहित सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपर, उदीयमान खेलाडी र उत्कृष्ट प्रशिक्षकले आकर्षक पुरस्कार प्राप्त गर्नेछन् ।
यस अवसरमा फुटबलसँगै म्याराथन, पक्लुङ(छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायत खेलहरु समेतहुने आयोजकले समितिले जानकारी दिए ।
