चैत्र ९, चितवन । राष्ट्रिय महिला फुटबल प्रतियोगिताको उपाधि एपिएफ एफसीले जितेको छ । भरतपुरको कृष्णपुरको मैदानमा शनिबार सम्पन्न फाइनल खेलमा त्रिभुवन आर्मी फुटबल क्लबलाई टाइब्रेकरमा हराउँदै एपिएफले उपाधि चुमेको हो ।
प्रतिस्पर्धात्मक खेलमको १३औं मिनेटमा बिमला चौधरीले गोल गर्दै आर्मीलाई अग्रता दिलायो । एक गोलले पछि परेको एपिएफले दोस्रो हाफको अन्तिम समयमा उत्कृष्ट पुनरागमन गर्दै जित निकाल्यो ।
खेलको ७५औं मिनेटमा एपिएफकी रश्मि घिसिङले सुन्दर हेडर गोल गर्दै नतिजा बराबरी बानाइन् । उनले प्रिति राईको पासलाई सदुपयोग गरेकी थिइन् । बाँकी समयमा गोल हुन नसक्दा खेल टाईब्रेकरमा धकेलियो । टाईब्रेकरमा एपिएफ ४–२ ले विजयी भयो ।
विजेता टिमले नगद तीन लाख रुपैयाँ सहित ट्रफि प्राप्त गर्यो भने उपविजेताले नगद एक लाख ५० हजार रुपैयाँ र ट्रफिमा चित्त बुझाएकोछ ।
एपिएफकी प्रिती राई प्लेयर अफ दि म्याच हुदै १० हजार रुपैयाँ प्राप्त गरिन् । आर्मीकी चन्द्रा भण्डारी प्लेयर अद दि टुर्नामेन्ट बनिन् ।उनले ४० हजार प्राप्त गरिन् ।
अन्य व्यक्तिगत विधातर्फ एपिएफकी सावित्री किसन उत्कृष्ट गोल रक्षक, आर्मीकी बिमला बिक उत्कृष्ट डिफेन्डर, एपिएफकै रेनुका नगरकोटी उत्कृष्ट मिडफिल्डर, सर्वाधिक गोलकर्ता ८ गोल गरेकी एपिएफकी रश्मि कुमारी घिसिङ र उत्कृष्ट प्रशिक्षक एपिएफका जिबेश पाण्डे घोषित भए । उनीहरुले जनही २०–२० हजार रुपैयाँ प्राप्त गरे ।
चितवन जिल्ला फुटबल संघको आयोजना तथा भरतपुर महानगरपालिकाको प्रवर्द्धनमा सम्पन्न प्रतियोगितामा ८ टोली सहभागी थिए ।
