चैत ८, ताप्लेजुङ । दोस्रो पाथीभरा याङवरक प्रदेश स्तरीय खुल्ला ब्याडमिन्टन प्रतियोगिताको उपाधि झापाका जुनुन राई र निरज सिलवालको जोडीले जितेको छ । चैत ५ देखि ८ गते सम्म सञ्चालित प्रतियोगिता पाथीभरा याङवरक २ थेचम्बु ताप्लेजुङमा रहेको पाथीभरा ब्याडमिन्टन हलमा आयोजना भएको थियो ।
पालिकाको आयोजनामा भएको फाइनल खेलमा मोरङका लाक्पा शेर्पा र ज्योतिहाङ राईको जोडीलाई २४–२२, १९–२१ र २१–१७ को सेटमा पराजित गर्दै जुनुन र निरज च्याम्पियन बनेको हो ।
उपाधि विजेताले नगद ४० हजार सहित ट्रफि, मेडल र प्रमाणपत्र हात पारे भने उपविजेताले नगद ३० हजार सहित ट्रफि, मेडल र प्रमाणपत्र प्राप्त गरे ।
यसका साथै सोही अवसरमा प्रदेश स्तरीय भेट्रान्स डबल प्रतियोगिता भएको थियो । अन्य इभेन्ट्सहरुमा ताप्लेजुङ जिल्ला स्तरीय कर्मचारी डबल्स, मिक्स डबल्स, मेन्स डबल जुनियर र जनप्रतिनिधि डबलका खेलहरु भएको थियो । यसैगरी मेन्स डबल जुनियर(सि) भने पाथीभरा याङवरक गाउँपालिका स्तरीय भएको थियो ।
