शिवसताक्षी । झापाको शिवसताक्षी नगरपालिका ३ पाराबारी स्थित श्री भानु माध्यमिक विधालयले साप्ताहिक कार्यक्रमको अवसरमा विधार्थीहरुलाई पोशाक वितरण गरेको छ ।
जेठ ३० गते शुक्रबार विधालय व्यवस्थापन समितिको अध्यक्ष गणेश बहादुर राईको अध्यक्षतामा आयोजित कार्यक्रमको प्रमुख अतिथि नेपाल प्रज्ञा पतिष्ठानका प्राज्ञ सुमित्रा बाङ्देल ‘चेली‘को हातबाट पोशाक वितरण गरिएको थियो । उनकै पहलमा हालमा युकेमा रहेका आर्थिक सहयोगदाता सुरेन दिम्माली राईबाट २० हजार उपलब्ध भएको थियो । उक्त रकमबाट बालविकासदेखि कक्षा ८ सम्मका १९जना बालबालिकाहरुलाई पोशाक वितरण गरिएको थियो । जसअन्तर्गत विधार्थीहरुको लागि आवश्यक पोशाकहरु सर्ट, पाइन्ट, फ्रक, जुत्ता, मोजा रहेको थियो ।
कार्यक्रममा वडा ३ का वडाध्यक्ष भास्कर न्यौपानेले स्थानीय तहबाट शिक्षा क्षेत्रमा विविध योजना सञ्चालन गर्नु पर्नेमा जोड दिए । उनले भानु माविप्रति सदैव दाताहरु लागिपरिरहेकोमा खुशी व्यक्त गरे ।
विधालयका अध्यक्ष गणेशबहादुर राईले भानुमाविका भौतिक संरचना र शैक्षिक श्रीबृद्धिका निम्ति संस्थागत पहल निरन्तर भइरहेको बताए । उनका अनुसार सामुदायिक विधालयप्रति आममानिसको धारणा सकारात्मक हुँदा यस विधालयले कहिले पाठ्यपुस्तक त कहिले पोशाक वितरण साथै विधार्थी लक्षित विभिन्न कार्यक्रमहरु गर्न सकिरहेको छ । उनले सहयोगी दाताहरुलाई धन्यवाद दिदै शैक्षिक क्षेत्रमा आमूल परिवर्तन सम्भव भएको र जसमा एक पक्षले नभई भानु माविले जस्तो सबै पक्ष सकारात्मक रुपमा सकृय भई अघि बढ्न आवश्यक भएको धारणा राखेका थिए ।
विव्यस, पिटिए, जनप्रतिनिधि, शिक्षक, विधार्थी, अभिभावक लागयतको उपस्थिति रहेको कार्यक्रममा विधालय व्यवस्थापन समितिको तर्फबाट सदस्य प्रेम खनालले शुभकामना मन्तव्य दिएका थिए ।
यसैगरी विधालयले साप्ताहिक कार्यक्रममा कविता प्रतियोगिता आयोजना गरी ११ जना सहभागीमध्ये दुईजनालाई सान्त्वना सहित प्रथम, द्धितीय, तृतीयलाई विजेता पुरस्कार तथा सहभागी सबैलाई सहभागिता पुरस्कार प्रदान गरेको थियो । सम्पूर्ण पुरस्कारको प्रायोजन प्रमुख अतिथि सुमित्रा बाङदेलले गरेका थिए ।
कार्यक्रममा शिक्षकद्वय कमल नेपाल र राधा बोगटी लुइटेलले कविता वाचन गरेका थिए । सरु भट्टराईको स्वागत मन्तव्य रहेको कार्यक्रमलाई सञ्चालन शिक्षक खुबबहादुर राई‘सञ्जय‘ले गरेका थिए ।
