सजन राई, माडसेबुङ । इलामको माङसेबुङमा १७औं आत्मानन्द कप मंसिर ९ देखि हुने भएको छ । किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा आमन्त्रित पुरुष फुटबल प्रतियोगिता ‘आत्मानन्द गोल्ड कप–२०८१‘ हुने भएको हो ।
प्रतियोगिता माङसेबुङ गाउँपालिका–५ स्थित प्रस्तावित आत्मानन्द रङ्गशालामा सञ्चालन हुने छ । बिहीवार पत्रकार सम्मेलनमा आत्मपवित्र खेलकुद समितिका अध्यक्ष मन कुमार आङबुहाङले प्रतियोगिता २०८१ मंसिर ९ देखि २० गतेसम्म सञ्चालन हुने जानकारी दिए ।
प्रतियोगितामा नेपाल र भारतका गरी ८ वटा टिमको सहभागिता रहने छ । जस्मा दुधे यूथ क्लब झापा, चुलाचुली स्पोर्टिङ क्लब झापा, सिरिजंगा स्पोर्टिङ क्लब मोरङ, दमक भाङबारी स्पोर्टिङ क्लब झापा, तिजोक युवा क्लब पाँचथर, माङसेबुङ गाउँपालिका इलाम, आयोजक र भारतबाट एमएफसि दार्जिलिङले सहभागी रहने छन् ।
विजेताले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र पाउने छन् भने उपविजेताले नगद दुई लाख पाँच हजार एक सय ७१ रुपैयाँ सँगै ट्रफि, मेडल र प्रमाणपत्र प्राप्त गर्नेछन् ।
व्यक्तिगत विधातर्फ म्यान अफ द म्याच सहित सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपरले आकर्षक पुरस्कार प्राप्त गर्नेछन् ।
यस अवसरमा फुटबलसँगै म्याराथन, पक्लुङ(छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायत खेलहरु समेत हुने आयोजकले समितिले जानकारी दिए ।
