मंसिर ९, माङसेबुङ । इलाम जिल्लाको प्रतिष्ठित फुटबल प्रतियोगिता आत्मानन्द गोल्ड कप २०८१ को उद्घाटन खेलमा सिरिजङ्गा स्पोर्टिङ क्लब मोरङ विजयी भएको छ ।
आइतबार माङसेबुङ ५ स्थित प्रस्तावित आत्मानन्द खेल मैदानमा भएको प्रतियोगितामा माङसेबुङ गाउँपालिकालाई टाईब्रेकरमा ४–३गोल अन्तरले पराजित गर्दै सिरिजङ्गा सेमिफाइनल पुग्न सफल भएको हो ।
प्रतिस्पर्धात्मक खेलको निर्धारित समय गोल रहित बराबरीमा सकिएपछि खेल टाईब्रेकर तर्फ धकेलिएको थियो ।
टाईब्रेकरमा सिरिजङ्गाका आशिस लावती, रोशन धिमाल, धिरेन क्षेत्री र साउरे राउतले गोल गर्दा सुजन रसाइलीको प्रहार माङसेबुङका गोलरक्षक आयुष योङहाङले विफल बनाइदिए । त्यसैगरी माङसेबुङका बिशाल दर्जी, प्रविण राई र निर्मल राई गोल गर्न सफल हुँदा रेजिन माझीको प्रहार बाहिरिएको थियो भने मिलन राईको प्रहार मोरङका गोलरक्षक प्रमिजर गच्छदारले रोकेका थिए । प्रमिजर खेलको मेन अफ दी म्याच घोषित भए ।
भोलि सोमबार आयोजक र दमक भाङबारी स्पोर्टिङ क्लब झापाबिच प्रतिस्पर्धा हुने आयोजक आत्मपवित्र खेलकुद समितिका अध्यक्ष मनप्रसाद आङबुहाङले जानकारी दिए ।
किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा १७औं आमन्त्रित पुरुष फुटबल प्रतियोगितामा माङसेबुङ र सिरिजङ्गा सहित दुधे यूथ क्लब झापा, चुलाचुली स्पोर्टिङ क्लब झापा, दमक भाङबारी स्पोर्टिङ क्लब झापा, तिजोक युवा क्लबपाँचथर, आयोजक टिम र भारतबाट एमएफसि दार्जिलिङको सहभागीता रहेको छ । प्रतियोगिता मंसिर ८ देखि १७ गते सम्म सञ्चालन हुनेछ ।
विजेताले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र पाउने छन् भने उपविजेताले नगद दुई लाखपाँच हजार एक सय ७१ रुपैयाँ सँगै ट्रफि, मेडल र प्रमाणपत्र प्राप्त गर्नेछन् ।
व्यक्तिगत विधातर्फ म्यान अफ द म्याच सहित सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपर, उदीयमान खेलाडी र उत्कृष्ट प्रशिक्षकले आकर्षक पुरस्कार प्राप्त गर्नेछन् ।
यस अवसरमा फुटबलसँगै म्याराथन, पक्लुङ(छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायत खेलहरु समेतहुने आयोजकले समितिले जानकारी दिए ।
पत्रकार र शिक्षक कर्मचारीबीचको मैत्रीपूर्ण खेलमा शिक्षक विजयी
गोल्ड कपको उद्घाटन खेल अघि भएको पत्रकार र शिक्षक तथा शैक्षिक कर्मचारीबीचको मैत्रीपूर्ण खेलमा शिक्षक टिमले १-० को विजयी हासिल गरेको छ ।
पहिलो हाफको ५औं मिनेटमा सरतजङहाङ राईको पासमा मचिन्द्र योङहाङले उत्कृष्ट गोल गर्दै टिमलाई अग्रता दिलाएका थिए । बाँकी समयमा दुवै टिमबाट कुनै पनि गोल हुन नसकेपछि खेल १-० गोल अन्तरमा सकिएको थियो ।
