मंसिर ११, माङसेबुङ । दुधे युथ क्लब झापा आत्मानन्द गोल्ड कप २०८१ को सेमिफाइनल पुग्ने तेस्रो टोली बनेको छ । इलाम जिल्लाको प्रतिष्ठित फुटबल प्रतियोगिताको तेस्रो दिनको खेलमा चुलाचुली स्पोर्टिङ क्लब झापालाई टाईब्रेकरमा ४–२ को गोल अन्तरले पराजित गर्दै दुधेले अन्तिम चारमा स्थान सुरक्षित गरेको हो ।
मंगलबार माङसेबुङ ५ स्थित प्रस्तावित आत्मानन्द खेल मैदानमा भएको प्रतियोगिताको निर्धारित समयमा १–१ गोलको बराबरी पछि खेल टाईब्रेकरमा पुगेको थियो ।
खेलको २२औं मिनेटमा दुधेका प्रदिप बुढाथोकीले गोल गर्दै टिमलाई अग्रता दिलाएका थिए । पहिलो हाफको अन्तिम समयमा अमन लामाको ह्याण्ड बलमा चुलाचुलीले पेनाल्टि पायो । जस्लाई कप्तान तिर्थ बस्नेतले सदुपयोग गर्दै बराबरी बनाए ।
टाईब्रेकरबाट नतिजा निर्धारण गरिएको खेलमा दुधेका विशाल तामाङ, प्रदिप बुढाथोकी, टेकेन मगर र सञ्जोक मगर गोल गर्न सफल भए । त्यस्तै चुलाचुलीका सञ्जय लिम्बू र पुजन चौधरीले गोल गर्दा समिर तामाङ र सुजन चौधरीको प्रहार दुधेका गोल किपर सन्दिप लिम्बूले विफल बनाइदिए ।
दुई पेनाल्टि प्रहार रोकेका सन्दिप म्यान अफ द म्याच घोषित भए ।
भोलि बुधबार पहिलो चरणको अन्तिम खेलमा साबिक विजेता तिजोक युवा क्लब पाँचथर र एमएफसि दार्जिलिङ भारतबीच प्रतिस्पर्धा हुने आयोजक आत्मपवित्र खेलकुद समितिका अध्यक्ष मनप्रसाद आङबुहाङले जानकारी दिए ।
किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा १७औं आमन्त्रित पुरुष फुटबल प्रतियोगितामा दुधे र चुलाचुली सहित माङसेबुङ गाउँपालिका इलाम, सिरिजङ्गा स्पोर्टिङ क्लब मोरङ, दमक भाङबारी स्पोर्टिङ क्लब झापा, तिजोक युवा क्लब पाँचथर, आयोजक टिम र भारतबाट एमएफसि दार्जिलिङको सहभागीता रहेको छ । प्रतियोगिता मंसिर ८ देखि १७ गते सम्म सञ्चालन हुनेछ ।
विजेताले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र पाउने छन् भने उपविजेताले नगद दुई लाख पाँच हजार एक सय ७१ रुपैयाँ सँगै ट्रफि, मेडल र प्रमाणपत्र प्राप्त गर्नेछन् ।
व्यक्तिगत विधातर्फ म्यान अफ द म्याच सहित सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपर, उदीयमान खेलाडी र उत्कृष्ट प्रशिक्षकले आकर्षक पुरस्कार प्राप्त गर्नेछन् ।
यस अवसरमा फुटबलसँगै म्याराथन, पक्लुङ(छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायत खेलहरु समेतहुने आयोजकले समितिले जानकारी दिए ।
