मंसिर १२, माङसेबुङ । साबिक विजेता तिजोक युवा क्लब पाँचथर आत्मानन्द गोल्ड कप २०८१ को सेमिफाइनल पुगेको छ । इलाम जिल्लाको प्रतिष्ठित फुटबल प्रतियोगिताको चौथो दिनको खेलमा एमएफसी दार्जिलिङ भारतलाई टाईब्रेकरमा ५–४ को गोल अन्तरले पराजित गर्दै तिजोकले अन्तिम चारमा स्थान सुरक्षित गरेको हो ।
बुधबार माङसेबुङ ५ स्थित प्रस्तावित आत्मानन्द खेल मैदानमा भएको प्रतियोगिताको निर्धारित समयमा गोल रहित बराबरीमा सकिएपछि खेल टाईब्रेकरमा पुगेको थियो ।
टाईब्रेकरमा तिजोक जितमा रोशन आङदेम्बे, बिनोद धमला, मिराक खजुम, जमिन लक्सम र निरज लिङदेनले गोल गरे । बेगम गुरुङको प्रहार भने दार्जिलिङका गोलरक्षक सचिन सुब्बाले बचाएका थिए । यस्तै दार्जिलिङका शरद मुन्डा, रोमन भुजेल, समिर प्रधान र देवासिङ रोयले गोल गरे । श्याम मुर्मु र मौसम सुब्बाको प्रहार तिजोक पाँचथरका गोलरक्षक मिराक खजुमले बचाएका थिए ।
खेलको मेन अफ द म्याच तिजोकका गोलरक्षक मिराक खजुम घोषित भए । उनले ट्रफी सहित नगद ५ हजार ७१ रुपैयाँ हात पारे ।
निर्धारित समयको खेलमा बराबरी खेलेको उपाधि दाबेदार मानिएको दुवै टोलीले दास्रो हाफमा भने आक्रमक खेल खेलेका थिए ।खेलको ५७औं मिनेटमा सुजन लिम्बूले गोल गर्दै पाहुना टोली दार्जिलिङलाई अग्रता दिलाएका थिए । तर, त्यसको दूई मिनेटपछि ५९औं मिनेटमा रितिक आङदेम्बेले गोल गर्दै पाँचथरलाई बराबरीमा फर्काए ।
भोलि बिहीबार सेमिफाइनलको पहिलो खेलमा सिरिजङ्गा स्पोर्टिङ क्लब मोरङ र दुधे युथ क्लब झापाबीच प्रतिस्पर्धा हुने आयोजक आत्मपवित्र खेलकुद समितिका अध्यक्ष मनप्रसाद आङबुहाङले जानकारी दिए ।
किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा १७औं आमन्त्रित पुरुष फुटबल प्रतियोगितामा तिजोक र एमएफसि सहित माङसेबुङ गाउँपालिका इलाम, सिरिजङ्गा स्पोर्टिङ क्लब मोरङ, दुधे यूथ क्लब झापा, चुलाचुली स्पोर्टिङ क्लबझापा, दमक भाङबारी स्पोर्टिङ क्लब झापा र आयोजक टिमको सहभागीता रहेको छ । प्रतियोगिता मंसिर ८ देखि १७ गते सम्म सञ्चालन हुनेछ ।
विजेताले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र पाउने छन् भने उपविजेताले नगद दुई लाखपाँच हजार एक सय ७१ रुपैयाँ सँगै ट्रफि, मेडल र प्रमाणपत्र प्राप्त गर्नेछन् ।
व्यक्तिगत विधातर्फ म्यान अफ द म्याच सहित सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपर, उदीयमानखेलाडी र उत्कृष्ट प्रशिक्षकले आकर्षक पुरस्कार प्राप्त गर्नेछन् ।
यस अवसरमा फुटबलसँगै म्याराथन, पक्लुङ(छेलो हान्ने), लठ्ठा तान्ने, धनुकाँड हान्ने, हाँडी फुटाउने, तेक्वान्दो लगायत खेलहरु समेतहुने आयोजकले समितिले जानकारी दिए ।
