मंसिर १७, माङसेबुङ । इलामको माङसेबुङमा सञ्चालन भएको आत्मानन्द गोल्डकप २०८१ को उपाधि दुधे युथ क्लब झापाले चुमेको छ ।
जिल्लाको प्रतिष्ठित फुटबल प्रतियोगिताको सोमबार भएको फाइनल खेलमा साविक विजेता तिजोक युवा क्लब पाँचथरलाई ३–१ को गोल अन्तरले हराउदै दुधेले उपाधि कब्जा गरेको हो ।
प्रतिस्पर्धात्मक खेलको पहिलो हाफको २६औं मिनेटमा निकेश श्रेष्ठले गोल गर्दै दुधे झापालाई अग्रता दिलाए । उनले फ्रिकिक मार्फत गोल गरेका थिए । त्यसपछि दोस्रो हाफको खेलमा ४६औं मिनेटमा निरज लिङदेनले गोल गर्दै तिजोक पाँचथरलाई बराबरीमा फर्काए ।
तर, खेलको ५५औं मिनेटमा दुधेका मनिस लिम्बूले गोल गर्दै दुधेलाई २–१ को अग्रता दिलाए । त्यसपछि खेलको ६२ औं मिनेटमा राजेश दाहालले गोल गर्दै दुधेको जित सुनिश्चित गरे ।
पहिलो सेमिफाइनल खेलमा सिरिजङ्गा स्पोर्टिङ क्लब मोरङलाई २–० गोल अन्तरले हराउदै दुधे फाइनल प्रवेश गरेको थियो । यसैगरी दोस्रो सेमिफाइनल खेलमा दमक भाङबारी स्पोर्टिङ क्लब झापालाई २–० गोलले हराउदै तिजोक उपाधि नजिक पुगेको हो । तिजोक गत संस्करणको विजेता हो ।
किरात धर्मगुरु मुहिङगुम अङसीमाङ लिङदेन आत्मानन्द सेइङको ७१औं शुभ–जन्मोत्सव तथा मुहिङगुम अङसीमामाङ साँबा पवित्रहाङमा लिङदेन नोमाङगेन्ना सेवाको अवसरमा १७औं आमन्त्रित पुरुष फुटबल प्रतियोगितामा तिजोक र दुधेसहित माङसेबुङ गाउँपालिका इलाम, दमक भाङबारी स्पोर्टिङ क्लब झापा, चुलाचुली स्पोर्टिङ क्लब झापा, सिरिजङ्गा स्पोर्टिङ क्लबमोरङ, आयोजक र भारतको एमएफसी दार्जिलिङको सहभागीता रहेको थियो ।
मंसिर ९ बाट सुरु भएको प्रतियोगिताको विजेता दुधेले नगद तीन लाख ११ हजार एक सय ७१ रुपैयाँ सहित ट्रफि मेडल र प्रमाणपत्र हात पारे भने उपविजेता बनेको तिजोकले नगद दुई लाख पाँच हजार एक सय ७१ रुपैयाँ सँगै ट्रफि, मेडल र प्रमाणपत्रमा चित्त बुझाए ।
