मंसिर २३, इलाम । साबिक विजेता एनआरटि काठमाडौं एनआरएनए इलाम गोल्डकपको सेमिफाइनल प्रवेश गरेको छ । इलाम सदरमुकाममा सुरु भएको दोस्रो संस्करणको अन्तर्राष्ट्रिय आमन्त्रण प्रतियोगिताको दोस्रो दिनको खेलमा दार्जिलिङको जिटिए–११ लाई २–१ गोल अन्तरले हराउदै दोस्रो चरण पुग्न सफल भयो ।
आइतबार इलाम सदरमुकाममा रहेको ठूलो टुँडिखेलमा भएको खेलको ३७औं मिनेटमा जिटिएका भाइचुङ राईले पेनाल्टि मार्फत गोल गर्दै अग्रता दिलाए । पहिलो हाफको अन्तिम समयमा एआरटिका नेमारले उत्कृष्ट गोल गर्दै खेल बराबरी बनाए । पहिलो हाफ बराबरीमा सकिएको खेलको दोस्रो हाफको ४१औं मिनेटमा मार्टिनले गोल गर्दै टिमको जित सुनिश्चित गरे ।
एनआरटिका जय गुरुङ म्यान अफ दी म्याच घोषित भए । उनले नगद आठ हजार एक सय सहित ट्रफि प्राप्त गरे । तेस्रो दिनको खेल सोमबार काठमाडौंको दुई टिम त्रिभुवन आर्मी क्लब र चर्ज ब्वाइज युनाटेड बिच हुनेछ ।
इलामको गौरवको रुपमा जिल्लाकै सर्वाधिक पुरस्कार राशी भएको गोल्डकपमा आयोजक सहित काठमाडौंका ए डिभिजन क्लबहरु त्रिभुवन आर्मी क्लब, सङ्कटा फुटबल क्लब, न्युरोड टिम (एनआरटी), चर्ज ब्वाइज युनाइटेट, मछिन्द्र फुटबल क्लब साथै झापाको रेडस्टार क्लब र पाहुना टोलीको रुपमा भारतको जीटीए–११ दार्जिलिङ गरी आठ टिमको सहभागिता रहेको छ ।
मंसिर २९ गतेसम्म सञ्चालन हुने गोल्डकपको विजेताले नगद १० लाख सहित ट्रफि, मेडल र प्रमाणपत्र हात पार्नेछन् भने उपविजेताले नगद रु पाँच लाख सहित ट्रफि, मेडल र प्रमाणपत्र पाउनेछन् ।
त्यसैगरी व्यक्तिगत विधातर्फ सर्वाधिक गोलकर्ता, उत्कृष्ट खेलाडी, उत्कृष्ट किपर, उत्कृष्ट मिडफिल्डर, उत्कृष्ट डिफेन्डर, उदीयमान खेलाडी र उत्कृष्ट कोचले नगद २५ हजार सहित ट्रफि प्राप्त गर्ने छन् ।
