मंसिर २५, इलाम । चर्च ब्वाईज युनाइटेड काठमाडौं दोस्रो एनआरएनए इलाम गोल्डकपको सेमिफाइनल प्रवेश गरेको छ । इलाम सदरमुकाममा सुरु भएको दोस्रो संस्करणको अन्तर्राष्ट्रिय आमन्त्रण प्रतियोगिताको तेस्रो दिनको खेलमा विभागीय टोली त्रिभुवन आर्मी क्लबलाई २–१ गोल अन्तरले हराउदै चर्चब्वाइज दोस्रो चरण पुग्न सफल भयो ।
आइतबार सदरमुकाममा रहेको ठूलो टुँडिखेलमा भएको खेलको सुरुवातमै आर्मीले पेनाल्टि पायो । जस्को सदुपयोग गर्दै निरज चौधरीले टिमलाई अग्रता दिलाए । पहिलो हाफ एक गोलले पछि परेको चर्चब्वाइजले दोस्रो हाफमा आक्रमक खेल प्रस्तुत गर्यो । खेलको ७५औं मिनेटमा रोहन कार्कीले गोल गर्दै खेल बराबरी बनायो । ८२औं मिनेटमा विदेशी खेलाडी अर्मान्डोले गोल गर्दै चर्चब्वाइजको जित पक्का गरे ।
टिमका लागि पहिलो गोल गरेक चर्चब्वाइजका रोहन कार्की म्यान अफ दी म्याच घोषित भए । उनले नगद आठ हजार एक सय सहित ट्रफि प्राप्त गरे ।
तेस्रो दिनको खेल अर्थात पहिलो चरणको अन्तिम खेल मंगलबार काठमाडौंको मछिन्द्र फुटबल क्लब र चर्ज झापाको रेड स्टार फुटबल क्लबबीच हुनेछ ।
इलामको गौरवको रुपमा जिल्लाकै सर्वाधिक पुरस्कार राशी भएको गोल्डकपमा आयोजक सहित काठमाडौंका ए डिभिजन क्लबहरु त्रिभुवन आर्मी क्लब, सङ्कटा फुटबल क्लब, न्युरोड टिम (एनआरटी), चर्ज ब्वाइज युनाइटेट, मछिन्द्र फुटबल क्लबसाथै झापाको रेडस्टार क्लब र पाहुना टोलीको रुपमा भारतको जीटीए–११ दार्जिलिङ गरी आठ टिमको सहभागिता रहेको छ ।
मंसिर २९ गतेसम्म सञ्चालन हुने गोल्डकपको विजेताले नगद १० लाख सहित ट्रफि, मेडल र प्रमाणपत्र हात पार्नेछन् भने उपविजेताले नगद रु पाँच लाख सहित ट्रफि, मेडल र प्रमाणपत्र पाउनेछन् ।
त्यसैगरी व्यक्तिगत विधातर्फ सर्वाधिक गोलकर्ता, उत्कृष्ट खेलाडी, उत्कृष्ट किपर, उत्कृष्ट मिडफिल्डर, उत्कृष्ट डिफेन्डर, उदीयमान खेलाडी र उत्कृष्ट कोचले नगद २५ हजार सहित ट्रफि प्राप्त गर्ने छन् ।
