मंसिर २६, इलाम । काठमाडौंको चर्च ब्वाइज युनाइटेड एनआरएनए इलाम गोल्डकपको फाइनल पुगेको छ ।
इलाम सदरमुकाममा सुरु भएको दोस्रो संस्करणको अन्तर्राष्ट्रिय आमन्त्रण प्रतियोगिताको पहिलो सेमिफाइनल खेलमा आयोजक रेडहर्ष फुटबल क्लबलाई शून्यका विरुद्ध एक गोल गर्दै उपाधि भिडन्त पक्का गरेको हो ।
आइतबार इलाम सदरमुकाममा रहेको ठूलो टुँडिखेलमा भएको खेलको इन्जुरी समयमा चर्च ब्वाइजका समिर तामाङले गोल गर्दै जित दर्ता गरेको थियो ।
बिहिबार डिफेन्डिङ च्याम्पियन न्युरोड फुटबल क्लब र रेड स्टार झापा बिच अन्तिम सेमिफाइनल हुनेछ । विजेताले मंसिर २९ गते चर्चब्वाइजसँग उपाधिको लागि खेल्नेछ ।
इलामको गौरवको रुपमा जिल्लाकै सर्वाधिक पुरस्कार राशी भएको गोल्डकपमा आयोजक सहित काठमाडौंका ए डिभिजन क्लबहरु त्रिभुवन आर्मी क्लब, सङ्कटा फुटबल क्लब, न्युरोड टिम (एनआरटी), चर्ज ब्वाइज युनाइटेट, मछिन्द्र फुटबल क्लबसाथै झापाको रेडस्टार क्लब र पाहुना टोलीको रुपमा भारतको जीटीए–११ दार्जिलिङ गरी आठ टिमको सहभागिता रहेको छ ।
मंसिर २९ गतेसम्म सञ्चालन हुने गोल्डकपको विजेताले नगद १० लाख सहित ट्रफि, मेडल र प्रमाणपत्र हात पार्नेछन् भने उपविजेताले नगद रु पाँच लाख सहित ट्रफि, मेडल र प्रमाणपत्र पाउनेछन् ।
त्यसैगरी व्यक्तिगत विधातर्फ सर्वाधिक गोलकर्ता, उत्कृष्ट खेलाडी, उत्कृष्ट किपर, उत्कृष्ट मिडफिल्डर, उत्कृष्ट डिफेन्डर, उदीयमान खेलाडी र उत्कृष्ट कोचले नगद २५ हजार सहित ट्रफि प्राप्त गर्ने छन् ।
