फागुन २५, इलाम । दोस्रो करेन्ट अन्तराष्ट्रिय आमन्त्रित महिला गोल्डकप २०८१ को उपाधि एपिएफ फुटबल क्लबले जितेको छ । शनिबार सम्पन्न फाइनल खेलमा त्रिभुवन आर्मी फुटबल क्लबलाई २–० गोल अन्तरले हराउदै एपिएफले उपाधि जितेको हो । शनिबार इलामको ठूलो टुँडिखेलमा भएको फाइनल खेलमा एपिएफका लागि सविता रानामगर र गीता रानाले गोल गरिन् । आर्मीको लागि सान्त्वना गोल विमला चौधरीको नाममा रह्यो ।
पहिलो हाफको २५औं मिनेटमा एपिएफकी गीता रानाले पेनाल्टी मार्फत गोल गर्दै टिमलाई अग्रता दिलाईन् । पहिलो हाफमा एकगोलको अग्रता बनाएको एपिएफले दोस्रो हाफको १९औं मिनेटमा सबिता रानामगरको गोलबाट अग्रता दोब्बर बनायो ।
आर्मीकी विमला चौधरीले दोस्रो हाफको २६औँ मिनेटमा गोल गरे पनि खेलमा फर्कन सकेन ।
विजेता एपिएफले नगद चार लाख सहित ट्रफी, मेडल र प्रमाणपत्र हात पार्यो भने उपविजेता आर्मीले नगद दुई लाख सहित ट्रफी, मेडलर प्रमाणपत्रमा चित्त बुझायो ।
फाइनल खेलको लेयर अफ दी म्याच सविता रानामगर भइन् । उनले नगद पाँच हजार प्राप्त गरिन् ।
व्यक्तिगत विधातर्फ आर्मीतर्फ उत्कृष्ट गोलकिपर अन्जना रानामगर, उत्कृष्ट डिफेन्डर विमला विक घोषित हुँदा एपिएफबाट हाइ स्कोरर रश्मिकुमार घिसिङ, उत्कृष्ट मिडफिल्डर रेनुका नगरकोटी र प्लेयर अफ दी टुर्नामेन्ट कप्तान अनिता बस्नेत भइन् ।
विधागत पुरस्कारतर्फ जनही नगद १० हजार प्रदान गरिएको थियो भने सर्वोत्कृष्ट खेलाडी बनेकी बस्नेतले नगद १५ हजार र ट्रफी पाइन् ।
विजेताहरुलाई पूर्व गृहमन्त्री कृष्णप्रसाद सिटौला, कोशी प्रदेश फुटबल संघका अध्यक्ष किशोर राई, आयोजक क्लबका अध्यक्ष ध्रुवराई लगायतले पुरस्कार प्रदान गरेका थिए ।
