चैत १८, माङसेबुङ । ईलामको माङसेबुङमा प्रथम तरुण दल गोल्ड कप २०८१ सुरु भएको छ । सोमबार माङसेबुङ–३ चतुरेमा बजारमा रहेको खेल मैदानमा भएको उद्घाटन खेलमा प्रयास युवा क्लब चिभुवा विजयी भएको छ । युथ अफ माङसेबुङलाई १ का विरुद्ध ३ गोलगर्दै चिभुवा दोस्रो चरण प्रवेश गरेको हो ।
त्यसैगरी सोमबार नै भएको दोस्रो खेलमा क्रोएसिया न्यू ब्वाइज एफसि गौरदहलाई टाइब्रेकरमा ५–४ गोल अन्तरले पराजित गर्दै मान्द्रे एफसि दोस्रो चरण पुगेको छ ।
मंगलबार हुने दोस्रो दिनको पहिलो खेल आयोजक र माङसेबुङ ४ इलाम बिच हुनेछ भने दोस्रो खेल माङमालुङ एफसि र पावा एफसि बिच हुनेछ ।
कार्यक्रममा तरुण दल इलाम अध्यक्ष नरेश श्रेष्ठ प्रमुख अतिथि रहेका थिए भने माङसेबुङ ३ निर्वाचित वडा अध्यक्ष जनम खम्बु, कांग्रेस नेताहरु रनमान थेवे, डिल्लि राजालिम लगायत अतिथिहरु रहेका थिए ।
चैत १८ देखि २५ गते सम्म सञ्चालन हुने प्रतियोगिताको विजेताले नगद ६० हजार सहित ट्रफि, मेडल र प्रमाणपत्र प्राप्त गर्ने छन् भने उपविजेताले नगद ४० हजार सहित ट्रफि, मेडल र प्रमाणपत्र पाउनेछन् ।
व्यक्तिगत विधातर्फ भने म्यान अफ द म्याच सहित प्लेयर अफ द टुर्नामेन्ट, हाइ स्कोरर, उत्कृष्ट गोल किपर, उत्कृष्ट फरवार्ड, उत्कृष्ट डिफेन्सले आकर्षक पुरस्कार पाउेछन् ।
स्वास्थ्यको लागि खेलकुद, राष्ट्रका लागि खेलकुद भन्ने मुल नाराका साथ सञ्चालन गर्न लागिएको प्रतियोगिताले समग्र माङसेबुङलाई फाइदा पुग्नु पर्ने तर्क राख्छन् तरुण दल माङसेबुङ अध्यक्ष तथा प्रतियोगिता संयोजक सुनिल राई । उनले खेलकुद प्रतियोगिताहरु भइरहने हो भने स्थानीय खेलाडी उत्पादनमा टेवा पुग्ने बताए । भन्छन् गाउँघरमा प्रतिभावान् खेलाडीहरु छन् तर उनिहरु पहुँच नहुदा अवसरको सदुपयोग गर्न सकिरहेका छैन । अब गाउँ स्तरको सम्भावना बोकेका खेलाडीहरुलाई राष्ट्रस्तरको टिममा पुग्ने गरिको गुरुयोजना स्थानीय सरकारले गर्नु पर्ने हुन्छ ।
