शिवसताक्षी । झापाको शिवसताक्षीमा जारी मेयर कप २०८१ को मंगलबार भएको खेलमा वडा १० फाइनल प्रवेश गरेको छ ।
शिवसताक्षी नगर खेलकुद विकास समितिको आयोजनामा सञ्चालित प्रतियोगितामा वडा १० ले ८ लाई एकको विरुद्ध २ गोल गर्दै विजयी भएको हो ।
खेलको सुरुवाती समयमा मुक्साम लिम्बूले गोल गर्दै वडा १० लाई अग्रता दिलाएका थिए । सोहन थापाले २३औं मिेटमा बराबरी गोल गरेपनि खेलको इन्जुरी समयमा मुक्सामले व्यक्तिगत दोस्रो गोल गर्दै उपाधि भिडन्त पक्का गरेका थिए ।
त्यसैगरी मंगलबार नै भएको दोस्रो सेमिफाइनल खेल वडा २ र ७ बिच भएको थियो । उक्त खेल २–२ गोलको बराबरीसँगै टाईब्रेकरमा समेत ४–४ गोलको बराबरी भएपछि बुधबार बाँकी खेल सम्पन्न गर्ने गरी स्थगित भएको छ । समय अभावको कारण दुवै टिमको सहमतिमा खेल सारिएको आयोजक समितिले जानकारी दिए ।
प्रतियोगिताको विजेताले नगद ५५ हजार रुपैयाँ र उपविजेताले नगद ४१ हजार रुपैयाँ सहित ट्रफी र प्रमाणपत्र प्राप्त गर्नेछन् ।
व्यक्तिगत विधातर्फ प्लेयर अफ द टुनामेन्ट ११ हजार, राइजिङ स्टार छ हजार ५ सय, हाइ स्कोर सात हजार ५ सय र बेष्ट गोलकिपर, बेष्ट फरवार्ड, बेष्ट मिडफिल्डर लगायत बेष्ट डिफेन्सले पाँच हजार ५ सयका दरले पाउने छन् ।
चैत २१ गतेबाट सुरु भएको प्रतियोगिताको फाइनल चैत २८ गते बिहीबार हुनेछ ।
