गोविन ल्वागुन, शिवसताक्षी । झापाको शिवसताक्षीमा जारी मेयर कप २०८१ को सोमबार भएको खेलमा वडा ८ विजयी भएको छ ।
शिवसताक्षी नगर खेलकुद विकास समितिको आयोजनामा सञ्चालित प्रतियोगितामा वडा ८ ले ११ लाइ शून्यको विरुद्ध १ गोल गर्दै सेमिफाइनल प्रवेश गरेको छ ।
खेलको ४५औं मिनेटमा मनिस मगरले दिएको क्रस पासलाई सदुपयोग गर्दै सोहन थापाले पोस्टको जाली चुमाएका थिए । त्यही गोल जितको लागि पर्याप्त बन्यो ।
खेलको म्यान अफ द म्याच विजेता टिमका सोहन थापा घोषित भए । उनले नगद दुई हजार १ सय प्राप्त गरे ।
मंगलबार पहिलो सेमिफाइनल खेल वडा १० र ८ बिच हुने छ भने दोस्रो सेमिफाइनल खेल वडा २ र ७ बिच हुनेछ ।
प्रतियोगिताको विजेताले नगद ५५ हजार रुपैयाँ र उपविजेताले नगद ४१ हजार रुपैयाँ सहित ट्रफी र प्रमाणपत्र प्राप्त गर्नेछन् ।
व्यक्तिगत विधातर्फ प्लेयर अफ द टुनामेन्ट ११ हजार, राइजिङ स्टार छ हजार ५ सय, हाइ स्कोर सात हजार ५ सय र बेष्ट गोलकिपर, बेष्ट फरवार्ड, बेष्ट मिडफिल्डर लगायत बेष्ट डिफेन्सले पाँच हजार ५ सयका दरले पाउने छन् ।
चैत २१ गतेबाट सुरु भएको प्रतियोगिताको फाइनल चैत २८ गते बिहीबार हुनेछ ।
